Як палепшыць дзіцячы сон: 10 парад
Добры сон у дзяцей
Добры начны сон — такі сон, пры якім дзіця засынае і спіць, не прачынаючыся па начах. Большасць дзяцей прачынаюцца раніцай самастойна, калі сон у іх якасны і яго дастаткова.
Засынанне
Звычайна дзіця засынае на працягу 20 хвілін пасля таго, як укладваецца спаць. Час, які спатрэбіцца на засынанне, залежыць ад таго, наколькі дзіця соннае, а таксама ад рэжыму яго дня і падрыхтоўкі да сну. Некаторыя спосабы падрыхтоўкі дапамагаюць дзіцяці супакоіцца перад сном, што спрыяе лёгкаму засынанню.
Што можна зрабіць, каб палепшыць сон дзіцяці: парады
1. Устанавіце распарадак падрыхтоўкі да сну.
Прыдумайце паўсядзённы распарадак падрыхтоўкі да сну, які будзе пачынацца прыблізна ў адзін і той жа час. Калі вы разам мыецеся, чытаеце перад сном і ўкладваецеся ў ложак, гэта дапамагае дзецям малодшага ўзросту адчуць сябе гатовымі да сну. Для крыху старэйшых дзяцей парадак падрыхтоўкі да сну можа ўключаць спакойную гутарку з вамі пра мінулы дзень, а затым самастойны адпачынак перад тым, як заснуць.
2. Арганізуйце адпачынак перад сном.
Дзіцяці неабходна расслабіцца перад сном. Старэйшым дзецям у гэтым можа дапамагчы чытанне кнігі, праслухоўванне спакойнай музыкі або практыка дыхання для рэлаксацыі. Калі дзіцяці неабходна больш за 30 хвілін на тое, каб заснуць, яму можа спатрэбіцца больш працяглы час, каб расслабіцца, перш чым вы выключыце святло і яно ляжа спаць.
3. Прытрымлівайцеся аднаго і таго ж графіка адыходу да сну і абуджэння.
Сачыце за тым, каб адыход да сну і абуджэнне вашага дзіцяці адбываліся прыкладна ў адзін і той жа час з розніцай, не большай за 1–2 гадзіны кожны дзень. Гэта дапамагае не збіваць біялагічны гадзіннік дзіцяці. Рэкамендуецца прытрымлівацца гэтай парады як у выхадныя і святочныя, так і ў буднія дні, калі дзіця ходзіць у школу.
4. Паклапаціцеся пра тое, каб дзённы сон у дзіцяці старэйшага ўзросту быў раннім і кароткім.
Большасць дзяцей перастаюць спаць днём ва ўзросце 3–5 гадоў. Калі дзіця, старэйшае за 5 гадоў, усё яшчэ спіць днём, паспрабуйце зрабіць так, каб яно спала не больш за 20 хвілін у пасляабедзенны час. Калі дзіця будзе спаць днём даўжэй і пазней, то яму можа быць больш цяжка засынаць ноччу.
5. Пераканайцеся, што дзіця ўначы адчувае сябе ў бяспецы.
Калі дзіця баіцца класціся спаць ці заставацца ў цемры, вы можаце хваліць і ўзнагароджваць яго кожны раз, калі яно праявіць смеласць. Таксама будзе карысна адмовіцца ад прагляду страшных тэлевізійных праграм, фільмаў, мультфільмаў і ад камп’ютарных гульняў. Некаторыя дзеці, якім страшна заставацца ў цемры, адчуваюць сябе больш спакойна, калі ў іх ёсць начное асвятленне.
6. Праверце ўзровень шуму і асветленасці ў спальні дзіцяці.
Выключыце ўздзеянне крыніц шуму і святла на дзіця, калі яно спіць. Сіняе святло ад экрана тэлевізара, камп’ютара, тэлефона і планшэта можа зніжаць выпрацоўку мелатаніну, затрымліваючы тым самым засынанне. Варта выключаць гаджэты па меншай меры за адну гадзіну да сну.
7. Кантралюйце выкарыстанне гадзінніка.
Калі дзіця часта правярае час, прапануйце яму размясціць гадзіннік у такім месцы, дзе яно не зможа яго ўбачыць.
8. Арганізуйце прыём ежы за некаторы час да сну.
Пачуццё голаду ці празмернай сытасці перад сном можа выклікаць у дзіцяці занепакоенасць і/або дыскамфорт.
9. Забяспечце атрыманне дастатковай колькасці натуральнага святла на працягу дня.
Дзіцяці важна атрымліваць як мага больш натуральнага святла на працягу дня, асабліва раніцай. Яркае святло змяншае выпрацоўку мелатаніну. Дзякуючы гэтаму ваша дзіця адчувае сябе бадзёрым і сабраным на працягу дня і сонным у той час, калі трэба класціся спаць.
10. Кантралюйце ўжыванне кафеіну.
Кафеін утрымліваецца ў энергетычных напітках, каве, чаі, шакаладзе і коле. Варта пазбягаць іх ужывання ў другой палове дня і ўвечары.
Заўсёды хваліце дзіця, калі заўважаеце, што яно спрабуе ўнесці змены ў рэжым сну або гатова прытрымлівацца новага распарадку дня.
Што рабіць, калі занепакоенасць уплывае на сон дзіцяці
Калі дзіця чымсьці занепакоена ці ўстрывожана і гэта перашкаджае яму расслабіцца перад сном, паспрабуйце адразу ж дапамагчы яму справіцца з гэтым. Калі гэта немагчыма, асцярожна супакойце дзіця і сплануйце, як усё наладзіць раніцай.
Праблемы са сном могуць паўплываць на настрой дзіцяці, вучобу ці адносіны. Калі такія праблемы ў яго працягваюцца больш за 2–4 тыдні, варта звярнуцца па дапамогу да педыятра.
