Прыемныя справы перад сном

Ключавыя моманты: пазітыўны распарадак дапаможа вашаму дзіцяці супакоіцца прыкладна за 20 хвілін да сну. Такі распарадак азначае выкананне аналагічных дзеянняў аднолькавым чынам кожны вечар. Гэтымі дзеяннямі могуць быць купанне, чыстка зубоў, чытанне. Калі ваша дзіця кладзецца спаць пазней, чым вам хацелася б, пачынайце дзеянні, прадугледжаныя ў распарадку, крыху раней кожныя некалькі дзён, паступова набліжаючыся да жаданага часу.

Пазітыўны распарадак перад сном: што гэта такое і ў чым карысць

Пазітыўны распарадак перад сном прадугледжвае, што ваша дзіця выконвае некалькі прыемных спраў прыкладна за 20 хвілін да сну.

Пазітыўны штодзённы рытуал перад сном — гэта выдатны спосаб супакоіць ваша дзіця і падрыхтаваць яго да сну. Ён таксама будзе садзейнічаць развіццю ў вашага дзіцяці добрых звычак перад сном як цяпер, так і ў будучыні.

Без правільнага рытуалу перад сном дзіцяці можа быць цяжка заснуць.

Калі вам важна зрабіць так, каб ваша немаўля ці малое дзіця лепш сцішвалася перад сном, вам дапаможа пазітыўны распарадак. Спецыялісты па дзіцячым здароўі амаль заўсёды рэкамендуюць яго перад сном, калі вы выкарыстоўваеце паводзінныя стратэгіі, такія як кантраляванае супакойванне або спецыяльныя рытуалы.

Як выглядае пазітыўны распарадак перад сном

Распарадак перад сном можа ўключаць даволі многа заняткаў. Сутнасць у тым, каб выконваць аналагічныя дзеянні больш-менш аднолькавым чынам кожны вечар, пачынаючы прыкладна за 20 хвілін да адыходу да сну.

Большасць спраў перад сном — гэта, як правіла, прывычныя дзеянні, напрыклад купанне і чыстка зубоў, а таксама ціхія і прыемныя заняткі — чытанне кніг або расказванне казак. Мэта заключаецца ў тым, каб захоўваць атмасферу спакою і добразычлівасці, выкарыстоўваючы пазітыўную ўвагу і пахвалу.

Вось прыклад распарадку перад сном, які можна выкарыстоўваць пасля вячэры і купання:

  • Ваша дзіця ціха гуляе 15–20 хвілін, таксама можна чытаць разам з ім.
  • Вы і ваша дзіця адпраўляецеся ў спальню.
  • Вы нядоўга абдымаеце і цалуеце дзіця на ноч.
  • Вы ўкладваеце дзіця ў ложак.

Па заканчэнні 20-хвіліннага «пазітыўнага перыяду» пажадайце дзіцяці добрай ночы. Калі яно капрызіць або спрабуе пярэчыць, дзейнічайце цвёрда. Спакойна і дружалюбна скажыце, што пара спаць, а затым адразу ж выйдзіце з пакоя.

З чаго пачаць: выбар часу сну

Спачатку вырашыце, у які час дзіцяці будзе лепш за ўсё ўкладвацца спаць, напрыклад, для малых дзяцей гэта часта перыяд паміж 19:00 і 20:00.

Калі вы хочаце, каб ваша дзіця было больш спакойным перад сном, лепш за ўсё пачынаць з часу, які бліжэй да таго моманту, калі дзіця звычайна засынае само. Гэта павялічвае верагоднасць таго, што распарадак адыходу да сну стане трывала прывязаным да часу сну вашага дзіцяці. Напрыклад, калі ваша дзіця канчаткова засынае каля 21:00, пачніце з гэтага часу ў якасці часовага арыенціра для адыходу да сну.

Змяшчэнне фактычнага часу адыходу да сну вашага дзіцяці да жаданага

Прыкладна праз тыдзень пасля таго, як вы ўведзяце пазітыўны распарадак перад сном, можна паступова пачынаць адпраўляць дзіця спаць крыху раней.

Гэта прадугледжвае адыход да сну прыкладна на 15 хвілін раней кожныя пару дзён. Так можна рабіць да той пары, пакуль вы не прыйдзеце да ідэальнага для дзіцяці часу адыходу да сну.

Напрыклад, ваша дзіця засынае ў 21:00, а вы хочаце, каб яно клалася спаць у 20:00. Ваша стратэгія наступная:

1. Пачніце ўкладваць дзіця спаць у 20:45. Рабіце так на працягу двух дзён запар.

2. У наступныя два дні пасуньце час адыходу да сну на 20:30.

3. Працягвайце гэты паступовы працэс «зрушэння», пакуль ваша дзіця не будзе ўкладвацца спаць у той час, калі вы хочаце.

На гэта можа пайсці некалькі тыдняў, але пазітыўны распарадак перад сном дапаможа вам вырашыць праблемы, якія ўзнікалі пры ўкладванні (напрыклад, дзіця будзе хутчэй супакойвацца), акрамя таго, дзіця будзе радзей зваць вас па начах. Пазітыўныя рытуалы перад сном таксама будуць садзейнічаць умацаванню адносін паміж вамі.