Удзел дарослых у гульнях дзяцей

Ніжэй прыведзены асноўныя прынцыпы арганізацыі гульні з вашым дзіцем.

Давайце магчымасць гуляць, а дзіця няхай прыдумвае, як гэта рабіць.

• для немаўлят гэта можа азначаць проста час, які вы праводзіце разам, абдымаючыся і размаўляючы; дзіця праявіць ініцыятыву і пачне гуляць — рухам, поглядам, голасам;
• для дзяцей старэйшага ўзросту гэта азначае прадастаўленне ім магчымасці свабодна распараджацца сваім часам і прыдумваць сабе заняткі.

Улічвайце інтарэсы дзіцяці і падтрымлівайце яго

• дайце дзіцяці цацкі, а таксама любыя іншыя матэрыялы для гульні: скрынкі, лісце, камяні, слоікі, кардонныя талеркі, старыя каструлі і мн. інш.;
• няхай усё гэта будзе даступна дзіцяці, каб яно магло браць патрэбнае, калі захоча.

Час ад часу дадавайце нешта новае

• зусім не абавязкова купляць дзіцяці новую цацку: апраніце старую па-іншаму, пастаўце ці пакладзіце яе ў што-небудзь; пагаварыце за цацку (агучце яе);
• прапануйце новыя ўражанні ў якасці крыніцы гульнявых ідэй: далучайце дзіця да выканання паўсядзённых спраў (прыгатаванне ежы, ажыццяўленне пакупак), гаварыце пра тое, што вы бачыце падчас прагулкі, даследуйце наваколле, даведвайцеся больш пра жывёл, якія яму падабаюцца, бярыце падчас прагулкі ў рукі цікавыя рэчы: галінкі, лісце, плады…

Паважайце ініцыятыву дзіцяці

• памятайце, што гульня сама па сабе мае сэнс для дзіцяці, нават калі вам здаецца інакш;
• прымайце дзіця, яго ўменні і навыкі, тое, як яно бачыць свет, як яно нешта сабе ўяўляе і робіць высновы; не менш важна навучыцца разумець, што яго цікавіць і што яно хоча даследаваць.

Будзьце цікавым партнёрам па гульні, каб садзейнічаць яе развіццю

• залатое правіла гульні: няхай дзіця вызначае паводзіны, сюжэт, ход і вынік гульні; а вы назірайце, прытрымлівайцеся правілаў, а пры неабходнасці прыўносьце нешта новае ў гульню — «наладжвайце» яе ці трохі змяняйце сцэнарый, напрыклад падкарэкціруйце касцюм персанажа, яго вобраз або паводзіны;
• не перарывайце гульню;
• памятайце, што галоўнае ў гульні не мэта ці вынік (напрыклад, пабудаваць мост з кубікаў), а тое, што адбываецца, калі мы спрабуем сфармуляваць мэту і знайсці спосаб яе дасягнення: хто хацеў пабудаваць мост, з чаго, што адбывалася падчас будаўніцтва маста, хто прыйшоў яго будаваць і г. д.;
• прагаворвайце дзіцяці, што адбываецца і што робіць яно і персанажы ў гульні, як яны сябе адчуваюць, што яны перажываюць;
• будзьце «люстэркам» для дзіцяці, каб яно магло правяраць свае ідэі, змяняць і развіваць іх.