Ты водзіш! Гульні для дзяцей ва ўзросце ад 0 да 6 гадоў

Паўтараць за сваім дзіцем — гэта добра, таму што ваша дзіця лепш за ўсё вучыцца, калі яно зацікаўлена ў гульні. Вам не трэба нічога спецыяльнага для гульні, якую прыдумала дзіця. Яна пачынаецца з таго, што вы звяртаеце ўвагу на тое, што цікава дзіцяці, а затым уключаецеся ў працэс.

Калі дзіця ў гульні галоўнае: чаму гэта для яго добра

Калі дзіця ў гульні галоўнае, гэта значыць, што яно прыдумвае правілы і вядзе яе. Назірайце за сваім дзіцем і рэагуйце на тое, што яно кажа ці робіць, каб канцэнтрацыя яго ўвагі захоўвалася даўжэй.

Калі дзіця адчувае сябе галоўным у нейкай справе, а вы прытрымліваецеся правілаў яго гульні, то яно лепш за ўсё вучыцца, захоўваючы цікавасць да занятку. Акрамя таго, калі ваша дзіця выступае ў ролі галоўнага ў гульні, яно развівае камунікатыўныя навыкі і вучыцца ўплываць на тое, што адбываецца навокал.

Што трэба для гульні, сутнасць якой вызначае дзіця

Для такіх гульняў не патрабуецца нічога асаблівага.

Усё, што трэба рабіць, — гэта прытрымлівацца таго, што цікава вашаму дзіцяці ў дадзены момант. Гэта можа быць цацка ці нешта з поля зроку дзіцяці, напрыклад птушка ці пажарная машына. А магчыма, гэта ўвогуле будзеце вы, тыя смешныя міны, якія вы строіце адзін аднаму, ці гукі, якія вы разам утвараеце.

Як зразумець, што важна дзіцяці падчас гульні

Звярніце ўвагу на тое, што цікавіць ваша дзіця. Гэта можа быць нешта, з чым яно гуляе, напрыклад мяч, ці нешта, што яно робіць, напрыклад скача па лужынах. У старэйшых дзяцей і дашкольнікаў з’яўляюцца пастаянныя інтарэсы, напрыклад дыназаўры, пажарныя машыны, каты, музыка — усё што заўгодна.
Спытайце сваё дзіця, ці можна вам пагуляць з ім.
Уключайцеся ў тое, што робіць дзіця. Калі яно коціць вам мяч, вы можаце пакаціць яго назад. Засяродзьцеся на занятку. Не адцягвайце ўвагу дзіцяці і не мяняйце тое, як яно нешта робіць. Калі ваша дзіця будуе вежу з кубікаў, таму што зараз яму вельмі падабаюцца замкі, паназірайце за ім і пачніце будаваць разам ці падавайце яму кубікі.
Задавайце пытанні ці каменціруйце тое, што вы абое робіце, напрыклад: «Вось гэта ты пакаціў — у мяне ледзь атрымалася злавіць!» або «Вялікі замак! Як думаеш, хто ў ім будзе жыць?». Дайце дзіцяці час адказаць.
Калі ваша дзіця пераключыцца на нешта новае, дазвольце яму быць галоўным. Напрыклад, калі яно перастане катаць мяч і возьмецца гуляць з кубікамі, пачніце рабіць гэта разам з ім.

Гульні, у якіх галоўныя — немаўляты і малыя дзеці

Нават зусім малыя дзеці могуць быць галоўнымі падчас гульні. Паглядзіце, куды накіраваны позірк дзіцяці, каб убачыць, што яго цікавіць.

Напрыклад: «Хто гэта? Гэта цёця сядзіць на канапе? Што яна робіць? Яна махае табе?». Калі дзіця ў адказ агукае ці лапоча, працягвайце гаварыць, як быццам вы размаўляеце адзін з адным.

Або, калі вы бачыце, што ваша дзіця глядзіць на цацку, напрыклад на яркую бразготку, паднясіце яе бліжэй і дайце яму патрымаць яе або патрэсці.