1 месец - запознавање

Комуницирање

Што има ново? 

Во текот на првиот месец од животот, бебето има голема и важна задача да се запознае со новата средина во која се наоѓа по раѓањето. Главниот начин на кој вашето бебе комуницира со вас во овој период е плачењето. Со плачење, бебето испраќа различни пораки - дека е гладно, пелената му е влажна, дека е уморно или едноставно дека му треба утешен допир.  Почнува да препознава звуци - особено гласовите на оние што се грижат за него.  Особено сака да слуша високи гласови, затоа мајките и татковците природно користат еден вид „бебешки разговор“ со бебињата.

Што можете да направите за да помогнете?

Навистина е важно секогаш да одговарате на повиците на вашето бебе во овој ран период. Понекогаш можеби не знаете зошто вашето бебе плаче, но дури и тогаш, важно е да го утешите со вашето присуство, глас, гушкање, галење и нежно лулање. Сето ова му помага да се чувствува безбедно. Слушајќи ги различните начини на плачење на вашето бебе, постепено ќе научите што се обидува да ви каже. Запомнете - не можете да го разгалите бебето држејќи го во раце, хранејќи го, гушкајќи го или разговарајќи и пеејчи му со нежен глас. 

Слушајте го неговиот плач и обидете се да ја разберете причината за плачењето. Бебето може да плаче затоа што само го сака вашиот допир или затоа што е гладно, се чувствува непријатно (непријатна положба на телото или влажна пелена), спие, има грчеви или затоа што го боли нешто друго. Секогаш утешувајте го вашето бебе со обраќање кон него со топол, смирувачки глас, земајќи го во раце, лулкајте го и гушкајте го. Не плашете се, нема да го разгалите. 

Чувства

Што има ново?

Вашето бебе повеќе би сакало да го гледа вашето лице и други човечки лица, отколку што било друго.  Вие сте центарот на неговиот живот.  Тоа сака и треба да биде близу до вас. Ова е негова прва врска која е моќна.  Тоа сака да го допираат, но не на начин што е премногу брз или груб.

Што можете да направите за да помогнете?

Бидејќи вашето бебе се уште не може да види многу работи на далечина, застанете близу до него кога можете - „Еве сум!  Гледај! ” Одржувајте физички контакт со бебето што е можно почесто - држете го во раце, гушкајте го. Уживајте во контакт кожа на кожа. Разговарајте со него, остварете контакт со очите и насмевнете се додека го храните, облекувате или капете.  Помогнете му да се смири, постапувајќи нежно и смирувачки со него, зборувајќи тивко. 

Мислење

Што има ново? 

Досега, вашето бебе се развиваше во безбеден простор во утробата на мајката. Раѓањето е голема промена за него. Сега ќе учи со гледање, слушање и допирање. Во овој период, човечките лица се најинтересното нешто за вашето бебе. До крајот на првиот месец, вашето бебе веројатно ќе може да го следи вашето лице со очите ако е доволно блиску (на околу 20 до 30 см). Предметите со впечатливи, контрастни бои - црно-бело или црвено-бело, исто така, ќе бидат многу интересни за него. Можеби ќе го слушне и препознае вашиот глас, но понекогаш може да реагира на ненадеен звук со целото тело.  На крајот на овој месец, вашето бебе ќе биде многу повнимателно и ќе реагира повеќе отколку во времето на неговото раѓање - големи промени за само неколку недели!

Што можете да направите за да помогнете?

Времето што го поминува со вас секој ден е клучно за неговиот севкупен развој и развојот на неговиот мозок. Начинот на кој ќе одговорите на потребите на вашето бебе ќе ја обликува неговата слика за светот и луѓето во него.  Тоа е толку едноставно и толку важно.

Движење

Што има ново?

Иако нервниот систем на вашето бебе се уште созрева, тој брзо се развива во текот на првиот месец од животот. До крајот на првиот месец, вашето бебе може да се обиде кратко да ја крене главата кога лежи на стомак или да ја сврти на страна кога лежи на грб. Ова му помага да види каде се наоѓате и да го набљудува возбудливиот свет околу него. Понекогаш цврсто ќе го држи прстот со раката, но најчесто ќе ги држи рацете во стегната тупаница. Може да трепери или да ги грчи рацете и нозете во движења што подоцна ќе станат покоординирани, а понекогаш ги приближува рацете до очите и устата. 

Што можете да направите за да помогнете?

Освен што го држите вашето бебе, ставете го да спие на грб за да биде безбедно и овозможете му многу кратки „времиња на стомак“ кога ќе го држите во скут кога не спие или кога не го држите. Дајте му слобода да ги користи рацете и нозете, но исто така гушнете го кога е вознемирено. 

За да прочитате повеќе начини како да го поддржите развојот на детето преку игра, одете во делот Играње заедно.

Загриженоста на родителите за развојот во 1 -виот месец 

Бидејќи секое дете се развива на свој посебен начин, невозможно е точно да се предвиди кога или како вашето дете ќе усоврши одредена вештина. Способностите (развојни пресвртници) очекувани и наведени за овој период ви даваат само општа идеја за промените што би можеле да ги очекувате со растот на вашето дете. Ве молиме, не грижете се ако неговиот развој тргне по малку поинаков пат.

Меѓутоа, за да бидете сигурни, разговарајте со вашиот педијатар доколку вашето дете покажува некои од следниве знаци на можно одложување на развојот, ако ви се чини дека вашето дете изгубило некои од вештините што ги имало порано, или ако имате други причини за загриженост:

• Плаче многу, а вие не можете да го утешите  
• Цица лошо и се храни многу бавно  
• Спие повеќе од очекуваното (повеќе од 16 часа дневно), или не спие мирно  
• Воопшто не ги движи рацете или нозете 
• Не се плаши кога се слуша силен звук 
• Не трепка на силни светла.