Предности на мајчиното млеко и доењето

Доењето е најстарата биолошка потреба произлезена од вроден инстинкт, благодарение на што сме преживеале како вид. Тоа е дел од процесот на репродукција, предуслов за опстанок и здравје, заеднички за сите култури и цивилизации. Нема замена за мајчиното млеко и ниту една друга храна за бебиња не може да се спореди со него!

Подготовки за доење

Долго пред чинот на породување, вашето тело започна да се подготвува за доење. Вашите гради ја сменија формата, станаа поцврсти и поголеми, кожата на градите стана почувствителна на допир. Брадавиците и ареолите станаа потемни; покрај тоа, промените во градите се често првиот знак на бременост. Колострумот започнува да се произведува помеѓу 16-та и 22-та недела од бременоста. Веднаш по породувањето, првиот оброк за вашето бебе е подготвен во вашите гради, иако повеќето мајки не се ни свесни дека веќе имаат млеко.

При носење на одлука за доење добро е да се знае дека

Вашето млеко е секогаш достапно, хигиенски безбедно, на соодветна температура, бесплатно.
Во првите шест месеци од животот, тоа е единствената храна и течност што му се потребни на детето.
Вашето млеко е специјално прилагодено на потребите и промените на вашето бебе и истите ги задоволува ден по ден, месец по месец, подој по подој.
Преку вкусот на мајчиното млеко, детето се запознава со вкусот на храната што ја јаде семејството.
Парите што ќе треба да ги издвојувате секој месец за млечна храна се приличен товар за семејниот буџет и истите може да ги користите на многу подобар и покорисен начин.

Светската здравствена организација (СЗО) и УНИЦЕФ препорачуваат ексклузивно доење до возраст од 6 месеци и продолжување на доењето до возраст од две години, со воведување на соодветна и безбедна храна од 6-тиот месец. Во 2006 година, СЗО презентираше нови стандарди за раст на децата од раѓање до 5-годишна возраст. Во развојот на овие стандарди, како биолошка норма е поставено дете кое е доено, со кое ќе се споредуваат сите други деца. Здружението на педијатрите на Македонија ги препорача овие стандарди за раст за следење на растот и нутритивниот статус на децата од раѓање до 5-годишна возраст.

За детето, придобивките од доењето започнуваат на рана возраст и траат цел живот. Мајчиното млеко го подготвува организмот за долгорочна здравствена заштита и прилагодување кон околината. Додека бебето цица, ризикот од развој на разни болести се намалува:

Цревни инфекции - во развиените земји доењето ги намалува трошоците за третман на цревни инфекции, а во неразвиените им го спасува животот на децата
Тешки респираторни инфекции - докажано намалена стапка на хоспитализација поради инфекции на долниот респираторен тракт
Otitis media (воспаление на средно уво)
Синдром на ненадејна смрт кај новороденчиња

Подоцна во детството, ризикот од:

Алергија / астма, атопичен дерматитис
Детска леукемија
Целијачна болест и воспалително заболување на цревата кај деца
Доењето помага за правилно избивање на забите, развој на вилицата и гласниот апарат
Во развиените земји во светот хроничните незаразни болести се водечка причина за смрт, како и за појава на заболување, неспособност за работа и огромни трошоци.
Доените бебиња ќе имаат понизок холестерол и помал ризик од кардиоваскуларни болести, дебелина и дијабетес подоцна во животот.
Доењето и мајчиното млеко се покажаа ефикасни во ублажувањето на процедуралната болка - болка предизвикана од дијагностички и други процедури, како што се земање примероци од капиларна крв, вакцинирање итн.

Позитивно влијание врз когнитивните функции

Доењето ги подобрува повисоките мозочни функции, како што се размислување и меморија;
Бебињата кои се дојат, имаат подобри резултати на тестовите за интелигенција.
Овие ефекти се особено важни за децата со зголемен ризик, како што се предвремено родените деца и оние со мала родилна тежина.
Подобрувањето на когнитивните функции е директно поврзано со должината на доењето.

Предности на доењето за мајката

Доењето доведува до намалување на ризикот од карцином на дојка и јајници пред менопауза, како и за дијабет тип 2 како последица од гестацискиот.
Минерализацијата на коските е подобра и ризикот од фрактури на колк е намален на подоцнежна возраст.
Поголемата потрошувачка на калории и маснотии придонесува за полесно враќање кон телесната тежина пред бременоста.

Контрацептивен ефект: Доењето го одложува повторното воспоставување на менструалниот циклус, овулацијата и со тоа и можноста за зачнување. Овој ефект е, сепак, ограничен и зависи од голем број фактори. Не потпирајте се на тоа дека сте заштитени од несакана бременост додека доите; овулацијата може да се појави и без менструација. Прашајте го вашиот гинеколог кој метод на контрацепција е најдобар за време на доењето. Интервалот помеѓу две бремености треба да биде најмалку две години, особено ако породувањето се случило со царски рез.

Колку подолго доите, толку подобро! За детето: најдобро е кога започнува од првиот ден и кога детето е исклучиво доено; позитивните ефекти се манифестираат по три месеци ексклузивно доење и се зголемуваат со подолго доење. За мајката: ефектите од доењето на секое дете се собираат!

ДОЕЊЕТО е многу повеќе од само јадење. За време на доењето, се воспоставува силна врска помеѓу мајката и бебето и потребата на бебето за љубов, топлина и безбедност се исполнува на посебен начин. ДОЕЊЕТО Е И ХРАНА ЗА ДУШАТА!