Yassi yoki botiq (ichiga kirgan) soʻrgʻichlar

Birinchi marta emizgan ayollarning qariyb 10 foizida soʻrgʻichlari yassi yoki botiq boʻlib, bu koʻkrak soʻrgʻichini koʻtaradigan mushak toʻqimalarining qayishqoqligi yetarli emasligidan kelib chiqadi. Koʻkrak soʻrgʻichining faqat tashqi koʻrinishiga qarab turib emizish paytida qanday ishlashini aniqlash mumkin emas.

Muammo koʻkrakka sut kelganda namoyon boʻladi: koʻkrak shishadi, soʻrgʻich atrofi esa shishib, dagʻallashadi. Yaxshiyamki, bu holat odatda vaqtinchalik; toʻqimalarning qayishqoqligi yaxshilanadi, bola kuchliroq boʻladi va emizish texnikasi yaxshilanadi.

Emizishdan oldin koʻkrak soʻrgʻichlarini torting:

  • sochiq bilan soʻrgʻichni biroz “kuchliroq” silang;
  • sut sogʻish uskunasi yoki soʻrgʻichlarni tuzatuvchi moslamalardan (korrektordan) foydalaning;
  • soʻrgʻich va areola uchun ochiq joylari boʻlgan siynaband taqing.

Soʻrgʻich uchun silikonli qoplama yordam berishi mumkin; hajmi soʻrgʻichning oʻlchamiga mos kelishi zarur.

Koʻkrak soʻrgʻichlari uchun korrektorlar (soʻrgʻichni tortib chiqaradi) baʼzi ayollarga yordam berishi mumkin. Soʻrgʻichning shishishi yoki shikastlanishiga yoʻl qoʻymaslik uchun ehtiyot boʻlish kerak. Emizishda qiyinchiliklarga duch kelish ehtimoli boʻlgan bolalarda (vaqtidan oldin tugʻilgan, kamvazn yoki bemor chaqaloqlar), ayniqsa, yassi soʻrgʻichlar bilan bogʻliq muammolar kuzatilishi mumkin. Bunday hollarda bolani emizish boʻyicha qoʻshimcha kuzatish, shuningdek, individual ovqatlantirish rejasi talab qilinadi.

Baʼzida koʻkrak uchlari juda botiq boʻlib, bolaga koʻkrakni soʻrish juda qiyin kechadi. Agar bolani emizishning iloji boʻlmasa, bu uni ona suti bilan boqish mumkin emasligini anglatmaydi. Bolaga sogʻilgan ona sutini berib boqish tabiiy ovqatlanishning barcha afzalliklarini taʼminlaydi.

Soʻrgʻichlarning yassi yoki botiq boʻlishi emizishni erta toʻxtatish va emizishdan voz kechishning asosiy sababidir. Agar sizda muammo boʻlsa, sabr-toqatli boʻlishingiz va mutaxassisga murojaat qilishingiz zarur. Emizishning muvaffaqiyatli kechishini taʼminlash uchun boshida bolaning vaznini tez-tez oʻlchab turish kerak.