Дыфтэрыя
Дыфтэрыя перадаецца пры прамым кантакце з інфіцыраваным чалавекам або паветрана-кропельным шляхам ад яго падчас кашлю і чхання. Інкубацыйны перыяд (ад моманту заражэння да першых прыкмет захворвання) звычайна складае 2–5 дзён (можа быць ад 1 да 10 дзён).
Прыкметы і сімптомы хваробы
Бактэрыя выклікае запаленне слізістых абалонак носа, глоткі, гартані і міндалін і нязначнае павышэнне тэмпературы цела. На працягу 2–3 дзён на міндалінах, мяккім паднябенні і глотцы ўтвараюцца блакітна-белыя абалонкі — плёнкі рознага памеру. Падобныя змены могуць распаўсюджвацца на галасавыя звязкі пры кашлі; у дадатак да гарачкі ўзнікае ахрыпласць голасу. Слаі плёнак трывала прымацаваны да слізістай тканкі, звужаюць дыхальныя шляхі і ствараюць небяспеку для дыхання. Таксін, выдзяляемы гэтай бактэрыяй, абсарбіруецца і распаўсюджваецца з крывёй па розных органах, што можа прывесці да шматлікіх ускладненняў.
Ускладненні
Найбольш частым ускладненнем, што ўзнікае ў выніку дзеяння таксінаў дыфтэрыі, з’яўляецца запаленне сардэчнай мышцы і перыферычных нерваў. Сардэчныя ўскладненні ўключаюць анамальную частату сардэчных скарачэнняў і сардэчную недастатковасць. Пашкоджанне нервовай сістэмы можа выклікаць парушэнне свядомасці і прывесці да комы. Магчыма часовая страта пашкоджанымі нервамі сваіх функцый — надыходзіць параліч мышцаў мяккага паднябення, мышцаў вачэй, канечнасцей, дыяфрагмы і г. д. Гэтыя ўскладненні могуць быць фатальнымі — каля 20 % дзяцей з дыфтэрыяй, малодшых за 5 гадоў, паміраюць ад гэтага захворвання.
Лячэнне дыфтэрыі
Лячэнне дыфтэрыі ўключае антыбіётыкі ў адпаведнай дозе, антытаксіны і агульную сімптаматычную падтрымку.
Прафілактыка дыфтэрыі
Абарона дзіцяці ад дыфтэрыі забяспечваецца імунізацыяй. Прышчэпка ад дыфтэрыі ўводзіцца ў складзе шматкампанентнай вакцыны супраць слупняку, коклюшу, ХіБ-інфекцыі і гепатыту В ва ўзросце 2, 3 і 4 месяцаў, затым яшчэ адна доза ў 18 месяцаў. Пазнейшыя дозы ўводзяцца разам з вакцынай супраць слупняку ў 6 і 11 гадоў у адпаведнасці з Нацыянальным календаром прафілактычных прышчэпак.
Дзякуючы паспяховай вакцынацыі дзяцей на сённяшні дзень хвароба не рэгіструецца ў многіх краінах, аднак інфекцыя ўсё яшчэ існуе ў некаторых частках свету і можа быць занесена ў іншыя рэгіёны, таму неабходна засцерагчы дзіця абавязковай імунізацыяй ад дыфтэрыі.
