Мыем гародніну і садавіну разам з дзецьмі 3–6 гадоў

Мыццё садавіны і гародніны можа стаць для вашага дзіцяці нянудным спосабам даведацца новыя словы, асвоіць навыкі ліку і мыслення. Усё, што вам трэба, — гэта свежая гародніна і садавіна, ракавіна і кран. Навучайце дзіця, размаўляючы з ім, знаёмячы з новымі паняццямі і задаючы пытанні.

Мыем гародніну і садавіну разам з дзецьмі і навучаем іх новаму

Сумеснае мыццё гародніны і садавіны — гэта добры спосаб:

  • пазнаёміць дзіця з новымі словамі — «перац», «цукіні», «сліва»;
  • пазнаёміць дзіця з такімі матэматычнымі паняццямі, як форма, памер і вага;
  • развіваць навыкі мыслення;
  • зацікавіць дзіця вывучэннем навакольнага асяроддзя;
  • расказаць дзіцяці пра штодзённую гігіену і здаровае харчаванне.

Што трэба для мыцця садавіны і гародніны

Прынёсшы садавіну і гародніну дадому з рынку ці з магазіна, прапануйце дзіцяці іх памыць.

Чым больш садавіны і гародніны, тым лепш.

Для таго, каб дзіця дапамагло вам, спатрэбяцца ракавіна, кран і крыху часу.

Як ператварыць мыццё садавіны і гародніны ў навучальны занятак

Спачатку:

  • Напоўніце ракавіну чыстай прахалоднай вадой, у якой будзеце мыць садавіну і гародніну.
  • Пераканайцеся, што дзіцяці ўсё добра бачна і яно да ўсяго дастае. Вазьміце для яго бяспечную табурэтку або лесвічку-драбінку, на якую можна ўстаць пры неабходнасці.
  • Пакажыце дзіцяці, як мыць садавіну ці гародніну: апусціце плод у ваду і акуратна патрыце рукамі.
  • Дастаньце з вады і вытрыце.

Як толькі дзіця зразумее, што трэба рабіць, дайце яму магчымасць даследаваць. Назірайце за яго дзеяннямі і ўводзьце новыя словы і паняцці падчас гутаркі. Напрыклад:

  • Пагаварыце пра колеры. Папрасіце дзіця сказаць, якога колеру садавіна і гародніна перад ім.
  • Пагаварыце пра форму, памеры, кансістэнцыі. Можна параўноўваць, напрыклад: «Які памідор большы?», «Гэтая морква даўжэйшая за гэты агурок».
  • Паглядзіце, якія з пладоў усплываюць, а якія тонуць. Няхай дзіця паспрабуе адгадаць, усплыве ці патоне плод, які ён збіраецца апусціць у ваду.
  • Пагаварыце пра тое, як называюцца ядомыя часткі раслін. У шпінату гэта лісты, у радыскі і морквы — карані.

Улічваем узрост дзяцей

Памятайце пра інтарэсы і аб’ём увагі маленькага дзіцяці. Калі яму проста падабаецца плёскацца ў вадзе, дайце яму вымыць некалькі цвёрдых пладоў (морква ці яблыкі). Калі яно задаволіцца, вазьміце справу ў свае рукі.

Старэйшаму дзіцяці, пакуль яно мые садавіну і гародніну, можна задаваць больш складаныя пытанні, напрыклад: «Як ты думаеш, навошта раслінам патрэбна лісце?». А можна проста пагаварыць пра любімую садавіну і гародніну ці пра стравы, якія вы плануеце з іх прыгатаваць.