Leximi dhe tregimi i historive (përrallave) me foshnja dhe fëmijë

Pse është i rëndësishëm leximi për foshnjat dhe fëmijët e vegjël

Tregimi i përrallave, të folurit dhe të kënduarit çdo ditë e ndihmon zhvillimin e fëmijës suaj në shumë mënyra.

Ndarja e tregimeve me fëmijën tuaj nuk do të thotë që ju duhet të lexoni. Vetëm duke shikuar librat me fëmijën tuaj, mund të bëheni një tregimtar i shkëlqyer dhe një model i mirë për përdorimin e gjuhës dhe librave.

Leximi i tregimeve me fëmijë ka përfitime edhe për të rriturit. Koha e veçantë që kaloni duke lexuar së bashku ju ndihmon për ta ndërtuar marrëdhënien tuaj.

Ju mund të filloni t’i lexoni me zë fëmijës tuaj sa më shpejt që të dëshironi - sa më herët aq më mirë. Fëmija juaj do ta pëlqejë ta mbani në krahët tuaj, ta dëgjojë zërin tuaj, të dëgjojë rimë dhe ritëm dhe të shikojë fotografi. 

Tregimet dhe këngë

Leximi nuk është mënyra e vetme për të ndihmuar në zhvillimin e gjuhës dhe shkrim leximit të fëmijës suaj.

Tregimi i përrallave, këndimi i këngëve dhe recitimi i vjershave së bashku janë gjithashtu aktivitete të shkëlqyeshme për aftësitë e hershme të shkrim leximit – madje fëmija juaj ndoshta do të argëtohet shumë në të njëjtën kohë.

Ju mund të dëshironi t’i krijoni tregimet tuaja ose të ndani histori familjare. Fëmija juaj do të mësojë fjalë dhe do t’i zhvillojë aftësitë gjuhësore nga këngët, tregimet dhe bisedat që ndani së bashku.

Lexoni fëmijës tuaj në gjuhë të tjera

Ju mund të lexoni, këndoni dhe tregoni histori me fëmijën tuaj në çfarëdo gjuhe, që ndiheni më mirë duke folur.

Mos u shqetësoni nëse gjuha e shumicës së vendit nuk është gjuha amtare e fëmijës suaj. Baza e mirë në gjuhën e parë për një kohë në të vërtetë e ndihmon fëmijën tuaj që më vonë ta mësojë më lehtë gjuhën e dytë.

Nëse ju pëlqen, mund të flisni për fotografitë në libër në vend që t’i lexoni fjalët. A mundeni ju dhe fëmija juaj të krijoni një përrallë së bashku? Bëni atë që mundeni dhe aq sa jeni të kënaqur.

Kur të lexoni, këndoni dhe tregoni përralla me fëmijën tuaj

Koha e gjumit, koha e banjës, koha e shkurtër, koha në tren, në autobus, në makinë, në park, në karrocë fëmijësh, në krevat fëmijësh, kur jeni në dhomën e pritjes së mjekut ... çdo kohë është kohë e mirë për një përrallë! Ju mund t’i bëni librat pjesë e rutinës suaj të përditshme - merrni me vete për t’i ndarë dhe shijuar kudo.

Të dish kur të ndalosh mund të jetë po aq e rëndësishme sa të gjesh kohën për të ndarë një histori në radhë të parë. Kushtojini vëmendje reagimit të fëmijës suaj ndaj historisë dhe ndaloni nëse ai nuk po e shijon këtë herë. Ju gjithmonë mund të provoni një libër, këngë ose histori në një kohë tjetër.

Nëse nuk keni një libër ose nuk mund të krijoni një histori aty për aty, mos u shqetësoni. Ka shumë mënyra të tjera që ju dhe fëmija juaj mund të ndani shkronja, fjalë dhe fotografi. Për shembull, mund të shikoni:

• paketa në shtëpi ose në supermarket, veçanërisht paketimet e ushqimit
• veshje - çfarë ka të shkruar në bluzë me mëngë të shkurtra (maicë)? Çfarë ngjyre është?
• letra dhe shënime - çfarë thonë ata? Kush i dërgoi?
• shenja në dyqane, ose në autobusë dhe trena nëse mund të udhëtoni, ose në revista ose katalogë nëse nuk mund të udhëtoni - tregoni shenja që kanë të njëjtat shkronja me emrin e fëmijës tuaj
• menutë në restorante ose në internet - mund të jetë argëtuese për fëmijët më të mëdhenj t’i shikojnë menutë dhe ta kuptojnë se çfarë duan të hanë.

Këshilla për ndarjen e librave me foshnjat dhe fëmijët e vegjël

• Bëni një rutinë dhe përpiquni ta ndani të paktën një libër çdo ditë. Fëmijët, të cilëve iu lexohen libra bëhen lexues më të mirë! Gjeni një karrige leximi ku të dy ndiheni rehat.
• Fikni pajisjet tuaja dhe gjeni një vend të qetë për të lexuar.
• Mbajeni fëmijën tuaj afër ose në gjunjë derisa lexoni, në mënyrë që ajo ta shohë fytyrën tuaj dhe librin.
• Provoni zhurmat dhe tingujt qesharak - luani dhe argëtohuni!
• Bëjeni leximin e librit “interaktiv” -ndaloni dhe thoni gjëra të tilla si “Ooh, çfarë mendoni se do të ndodhë më pas?” ose “A e shihni macen? Kush ka një mace në familjen tonë?” Përfshini fëmijën tuaj duke inkurajuar të flasë për fotografitë dhe duke përsëritur fjalë dhe fraza të njohura.
• Lëreni vogëlushin tuaj të zgjedhë librat kur të jetë aq i madh sa të fillojë të pyesë - dhe jini të përgatitur për t’i lexuar pa pushim librat e tij të preferuar!

Nëse keni fëmijë më të mëdhenj, ata mund të ndajnë libra me fëmijët tuaj më të vegjël, ose mund të lexoni të gjithë së bashku. Ndërrimi i roleve, bërja e pyetjeve dhe dëgjimi i përgjigjeve janë të gjitha aftësi të rëndësishme, që do ta ndihmojnë fëmijën tuaj, kur të fillojë të mësojë të lexojë.

Edhe leximi për disa minuta në të njëjtën kohë është efektiv - jo gjithmonë duhet ta përfundoni librin.

Çfarë lloj librash të lexoni me fëmijën tuaj

Ka aq shumë libra për të zgjedhur sa që mund të jetë e vështirë të dish se ku të fillosh.

Si rregull i gjerë, fëmijët e vegjël shpesh kënaqen me libra, këngë dhe histori që kanë rimë të mirë, ritëm dhe përsëritje.

Zgjidhni libra që janë gjatësia e duhur për fëmijën tuaj dhe që përputhen me interesat në ndryshim të fëmijës suaj.

Për një udhëzues se çfarë mund t’i përshtatet fëmijës tuaj, ju mund të dëshironi t’i shikoni artikujt e mëposhtëm:

• Leximi me foshnjat që nga lindja
• Leximi me foshnjat nga mosha 12 muajsh
• Leximi me të vegjlit
• Leximi me parashkollorët.

Nëse dëshironi të provoni libra ose revista të reja pa shumë kosto, ndoshta mund të organizoni shkëmbime librash me miqtë, që kanë fëmijë në të njëjtën moshë.

Përdorimi i një biblioteke lokale

Nëse jeni në gjendje të shkoni në një bibliotekë falas në komunitetin tuaj, do të zbuloni se bibliotekat kanë shumë për të ofruar për ju dhe fëmijën tuaj. Huazimi i librave, nëse kjo është e mundur në situatën tuaj, do të thotë që gjithmonë do të keni gjëra të reja për të lexuar me fëmijën tuaj. 

Marrja e fëmijës tuaj në bibliotekë dhe lejimi i saj t’i zgjedhë librat e saj mund të jetë një aventurë argëtuese.

Shumë biblioteka ofrojnë kohë tregimesh dhe aktivitete për fëmijët e vegjël.