Стымуляванне сацыяльна-эмацыянальнага развіцця ў 18–24 месяцы

Ваша дзіця ўсё больш усведамляе сябе і свае патрэбы. Яму цяпер не так трывожна расставацца з вамі. Дзіцяці падабаецца гуляць разам з вамі. У гэты перыяд яно ўсё часцей выказвае сваю нязгоду з чым-небудзь ці спрабуе зрабіць нешта па-свойму. У дзіцяці могуць узнікаць больш бурныя рэакцыі, калі яно не атрымлівае таго, што хоча, або калі нешта забаронена. Неабходны час і цярпенне, каб яно прывыкла да таго, што іншы раз трэба пачакаць, ці што не ўсё можна.

Сацыяльныя пачуцці

• Вопыт, які чалавек набывае пры ўзаемадзеянні з іншымі людзьмі, выклікае розныя пачуцці. Часам яны бываюць моцнымі і іх цяжка кантраляваць.

• Акрамя радасці ці гневу, у дзіцяці можа ўзнікаць пачуццё збянтэжанасці і дыскамфорту з-за няўдач, сораму або зайздрасці. Ваша рэакцыя — адабрэнне або крытыка — фарміруе пачуцці дзіцяці.

• Дапамажыце дзіцяці ўсвядоміць і абазначыць свае эмоцыі, у гэтым выпадку яно будзе лепш сябе адчуваць і яму будзе лягчэй кантраляваць моцныя эмацыянальныя праяўленні. Пры гэтым дзіцяці будзе прасцей разумець і паважаць пачуцці іншых людзей.

• Будзьце ўважлівы і асцярожны, калі крытыкуеце паводзіны дзіцяці, — прагаворвайце, што вы разумееце яго пачуцці, зразумела тлумачце, чым выклікана крытыка.

Пратэст і нежаданне слухацца

• У гэты перыяд могуць часцей узнікаць сітуацыі, калі ваша дзіця не робіць таго, чаго вы ад яго чакаеце. Такім чынам яно паказвае сваю незалежнасць, настойлівасць у рэалізацыі сваіх намераў, але таксама і тое, што яму цяжка прымаць некаторыя абмежаванні і правілы.

• Многія эмацыянальныя праяўленні ў дзіцяці могуць выяўляцца ў выглядзе нястрымных пратэстаў — істэрык. Старайцеся захоўваць спакой. Не рэагуйце рэзка, не злуйцеся. Вашы паводзіны павінны быць накіраваны на тое, каб дапамагчы дзіцяці спраўляцца з такімі сітуацыямі.

• Сачыце за тым, каб вашы патрабаванні і рэакцыі былі паслядоўнымі і зразумелымі для вашага дзіцяці. Старайцеся тлумачыць свае дзеянні, давайце яму зразумець, чаму лепш слухацца і жыць дружна.

• Часам дарослым даводзіцца пераглядаць правілы. Калі вы ўстанаўліваеце занадта многа абмежаванняў, гэта можа выклікаць больш рэзкае супраціўленне з боку дзіцяці і пагоршыць паводзінныя праблемы.