2 месеци - заемно прилагодување и воспоставување рутини

Комуницирање

Што има ново? 

Првото нешто што може да го забележите во овој период е дека вашето бебе плаче повеќе отколку во првите денови по раѓањето. Ова се очекува во текот на вториот месец од развојот, а ќе продолжи и во текот на третиот месец.  Тоа всушност значи дека вашето бебе учи да комуницира со вас. Неговите плачења сега се појасни - различни плачења што укажуваат дека е гладно, пелената му е мокра или е уморно. Ќе почнете и да забележувате дека почнува да испушта звуци на гугање (може да биде „оо“ или „аах“) и гуга. 

Што можете да направите за да помогнете?

Му треба време да се увери дека го разбирате начинот на кој тоа комуницира, па затоа е важно секој пат да одговорите на неговиот плач. Зборувајте му јасно и бавно секогаш кога ќе испушти звук, покажете ја радоста со изразот на лицето и гласот и повторете ги неговите звуци.               

Чувства

Што има ново?

Вашето бебе развива врска со вас и ве препознава - главно по вашиот мирис и глас.  Се обидува да ве бара вас и други луѓе. Во овој период, веќе може да ви одговори со својата прва насмевка - магичен момент.  

Генерално, ќе стане почувствително на звуци во текот на вториот месец - не само што ќе ве препознае кога разговарате со него, туку и ќе одговори на вашиот глас, барајќи го вашето лице кога разговарате со него. Се разбира, тоа се уште има потреба од удобноста на вашата прегратка, но станува способно да се утеши себеси, на пример, ставајќи ја раката во уста. 

Што можете да направите за да помогнете?

Секогаш кога ќе одговорите со задоволување на потребата на вашето бебе - хранење, менување влажна пелена или зборување и допир - тоа ќе се чувствува удобно и безбедно. Секогаш смирете го зборувајќи со мек глас, нежно допирање, лулање или пеење. Вашето бебе сака да биде близу вас. Тоа сака да гледа наоколу и да слуша. Нишкајте го, пејте и разговарајте и често играјте со него. Обрнете внимание на она што го радува и што го смирува.  Помогнете му да научи да се смири - добро е да си ги цица прстите. 

Мислење

Што има ново? 

Во овој период, бебето учи многу преку очите - на пример, следи интересни предмети. Тоа е љубопитно за лицата што ги гледа, кои се уште еден извор на нови информации. Може да почне да му е здодевно доколку некоја активност не се промени, или да биде премногу стимулирано ако има премногу промени.

Што можете да направите за да помогнете?

Кога вашето бебе е на стомак, можете да ставите играчка со светли бои пред него и да го преместите од една на друга страна. Ако почне да се жали, да ја сврти главата настрана или да плаче за време на играта, тоа може да биде знак за прекумерна стимулација. Можеби ќе треба малку да ја забавите играта или да направите пауза.  Вие најдобро го знаете вашето бебе!  Можете да му понудите на вашето бебе различни работи што може да ги погледне, допре или држи во раката. Кога лежи на грб, држете играчка или штракајте над главата, на ниво на очите и охрабрете го да посегне по неа.  Ова е нов и интересен проблем за него и ќе се обидува да го реши.

Движење

Што има ново?

До крајот на вториот месец, моторните вештини на вашето бебе стануваат се подобри и подобри.   Децата се развиваат во различни временски рокови, но во овој период, тоа веројатно ќе може да ја крене главата и да ја помести од една на друга страна кога лежи на стомак.  Неговите движења на рацете и нозете се пофини и покоординирани отколку кога беше новороденче. Интересно му е да го открива своето тело, па рацете и прстите се најзабавни за него во овој период. На пример, ќе ги истражува своите раце гледајќи ги, спојувајќи ги и раздвојувајќи ги, и со ваша помош, ќе може да држи предмет во рацете.

Што можете да направите за да помогнете?

Ставете го на стомак кога е будно, со интересни, безбедни предмети во близина. Тапкајте го и масирајте го вашето бебе - ќе го поттикнете неговиот моторен развој.  Во исто време, ќе се поврзете со него и ќе можете да го утешите ако е вознемирено.  

За да прочитате повеќе начини како да го поддржите развојот на детето преку игра, одете во делот Играње заедно.

Загриженост на родителите за развојот во текот на вториот месец 

Бидејќи секое дете се развива на свој посебен начин, невозможно е точно да се предвиди кога или како вашето дете ќе усоврши одредена вештина. Способностите (развојни пресвртници) очекувани и наведени за овој период ви даваат само општа идеја за промените што би можеле да ги очекувате како што вашето дете ќе расте.  Ве молиме, не грижете се ако неговиот развој тргне по малку поинаков пат.

Меѓутоа, за да бидете сигурни, разговарајте со вашиот педијатар доколку вашето дете покажува некој од следниве знаци на можно задоцнување во развојот, ако се чини дека вашето дете изгубило некои од вештините што ги имала во порана возраст, или ако имате други причини за загриженост:

• Често плаче многу, а вие обично не сте во можност да го смирите   
• Не гледа лица дури и за кратко време   
• Не реагира на силна светлина или гласни звуци   
• Не се храни или не спие добро (или спие повеќе од 16 часа на ден)   
• Воопшто не ги движи рацете или нозете
• Не ги носи рацете до устата   
• Не им се смее на луѓето.