Предвремено раѓање: прашања што треба да ги поставите

Зошто е добро да се поставуваат прашања за предвремено породување

Сосема е разбирливо ако се чувствувате загрижени за себе или за вашето бебе пред почетокот на предвремено породување.  Можете да се чувствувате  како се да е надвор од ваша контрола.

Еден начин да се почувствувате дека малку ги контролирате работите е да добиете информации со тоа што ќе разберете што ви треба и сакате да знаете и поставувате некои прашања.

Каде се раѓаат предвремено родени бебиња

Едно големо прашање може да биде - каде ќе го родам моето бебе пред време?

Најверојатно, ќе треба да се породите во стандардно родилиште во болница.

Ако вашето предвремено родено бебе или бебиња се родат многу рано - 32 недели или порано - можеби ќе треба да се породите во болница во која има единица за интензивна нега на новороденчиња (ЕИНН), а не во болница во која сте резервирале породување.

Болниците со ЕИНН обично се наоѓаат во поголемите градови. Ако живеете во рурална или оддалечена област, можеби ќе треба да одите во болница порано пред раѓањето.

Ако вашето бебе е родено во болница без ЕИНН а треба да биде сместено во таква единица, болницата ќе мора да користи специјализирано амбулантно возило за да го пренесе бебето во болница со ЕИНН. Ако болницата со ЕИНН има и породилно одделение, можеби ќе можете да се префрлите таму по раѓањето, откако ќе можете да патувате.  Разговарајте со вашиот лекар за да разберете како ќе се случи сето ова.

Што ќе се случи за време и по предвремено породување

Знаејќи што да очекувате за време на предвремено породување, може да ви помогне да разрешите некои од вашите грижи. Може да помогне да разговарате со вашиот лекар или медицинска сестра за да дознаете повеќе за породувањето, што ќе се случи потоа и како медицинскиот персонал ќе ве поддржи. Вашиот лекар или медицинска сестра може да договори да разговарате со медицинскиот тим кој ќе се грижи за вас и вашето бебе.

Еве неколку прашања што можете да ги поставите на вашиот лекар или акушерка за породувањето и раѓањето и како тие ќе ве поддржат.

Предвремено породување и раѓање

• Се чувствувам навистина вознемирено од сето ова. Тоа не е она што го очекував, и навистина сум загрижена за моето бебе. Што можете да направите за да ми помогнете?
• Дали ќе ми ги објасните работите едноставно за да можам да разберам?
• Дали знаете зошто моите породилни болки започнаа, или ќе започнат толку рано?
• Дали се уште можам да одберам како ќе се породам - на пример, вагинално породување, царски рез, епидурална анестезија? Ако не, зошто не?
• Немав шанса да одам на часови за раѓање. Дали ќе ми помогнете да дишам за време на контракциите и да управувам со породилните болки?
• Дали ќе можам да добијам нешто за олеснување на болката за време на породувањето?
• Дали ќе ми требаат лекови? Зошто? Што ќе направат лековите?
• Дали ќе ми кажете како ми оди породувањето и како ми е бебето?
• Дали мојот партнер може да остане со мене до раѓањето на бебето?

Предвремено родено бебе

• Дали можам да го видам и допрам моето бебе веднаш по раѓањето?
• Како ќе изгледа моето бебе, колку ќе биде големо и каква поддршка ќе му треба по раѓањето?
• Дали моето бебе ќе треба да оди во ЕИНН? Колку брзо по раѓањето?
• Дали јас или мојот партнер ќе можеме да одиме во ЕИНН со нашето бебе?
• Кога ќе можам да го држам моето бебе?
• Дали на моето бебе ќе му требаат лекови? Зошто? Што ќе направат лековите?
• Дали на моето бебе ќе му треба опрема? Зошто?
• Дали ќе живее моето бебе?

Се ме болеше кога медицинските сестри во болницата прикачија два монитори кои покажаа дека се породувам. Моите контракции беа во интервал од две минути. Докторот пристигна и беше одличен - не информираше за секој чекор, секоја последица, можните исходи. Нема време. Општа анестезија. Се исплашив - не за мене, туку за нашето бебе.
-Мајка на предвремено родено бебе од 33 недели