Farzandingizga oʻyinni boshqarishga ruxsat berish: 0–6 yoshli bolalar
Bolalar boshqaradigan oʻyin: nega bu chaqaloqlar va bolalar uchun foydali?
Bola oʻyinda boshchi boʻlsa, qoidalar oʻylab topadi va oʻyinni boshqaradi. Uning diqqatini biroz uzoqroq ushlab turish uchun uni kuzatib boring va aytganlariga yoki qilayotgan harakatlariga munosabat bildiring.
Farzandingizning yoʻl-yoʻriqlariga amal qilish yaxshi, chunki bolangiz faoliyatga qiziqsa, oʻrganish samarali boʻladi. Agar bolangizning qoidalari boʻyicha oʻynasangiz, unga mashgʻulot davomida oʻzini qiziqtirgan yangi narsalarni oʻrganishga yordam berishingiz mumkin.
Bundan tashqari, bolangiz yetakchilik qilganda uning muloqot qilish koʻnikmalari rivojlanadi va atrofdagi narsalarga qanday taʼsir qilishini bilib oladi.
Bolalar oʻyinlari uchun nima kerak?
Bolalar oʻyinlari uchun sizga hech qanday maxsus jihoz kerak emas.
Farzandingizni ayni paytda nima qiziqtirsa, oʻsha asosida oʻynang. Bu oʻyinchoq yoki qush, oʻt oʻchirish mashinasi kabi atrofdagi narsalar, hatto siz, kulgili yuzlar va tovushlar boʻlishi ham mumkin.
Oʻyinda bolaga qanday yetakchilik qilish kerak?
- Farzandingiz nimaga qiziqishiga eʼtibor qaratishdan boshlang. Bu bola oʻynaydigan biror narsa (masalan, toʻp) yoki u bajaradigan harakat (koʻlmaklar orasidan sakrash kabi) boʻlishi mumkin. Kattaroq yoshdagi yoki maktabgacha yoshdagi bolalarda muntazam qiziqish paydo boʻladi, masalan, dinozavrlar, oʻt oʻchiruvchilar, mushuklar yoki musiqa – har xil narsalar!
- Farzandingizdan birga oʻynashni soʻrang.
- Farzandingizning faoliyatiga qoʻshiling. Siz tomonga toʻpni dumalatsa, uni qaytarib dumalatishingiz mumkin. Mashgʻulotga eʼtiboringizni qarating. Bolani chalgʻitmasligingiz yoki mashgʻulotning uslubini oʻzgartirmasligingiz kerak. Agar u kubiklardan qasr qurayotgan boʻlsa (u hozir qasrlarni juda yoqtiradi), siz ham kuzatib, u bilan birga qurishingiz yoki kubiklarni olib berib turishingiz mumkin.
- Savollar bering yoki ikkalangiz qilayotgan ishga izoh keltiring – masalan, “Sen dumalatgan toʻpni zoʻrgʻa ushlab oldim!” yoki “Qasrning kattaligini qara! Seningcha, unda kim yashaydi?” Javob qaytarishi uchun farzandingizga vaqt bering.
- Agar farzandingiz yangi oʻyinga oʻtib ketsa, u vaziyatni boshqarishiga imkon bering. Masalan, u toʻp oʻynashni toʻxtatib, kubikchalarni oʻynay boshlasa, siz ham unga ergashing.
Kichkintoylar va yosh bolalar uchun bolalar oʻyinini moslashtirish
Hatto chaqaloqlar ham oʻyinni boshqarishi mumkin. Siz chaqaloqning koʻziga qarab uning qiziqishini bilib olishingiz mumkin.
Masalan, “Anavi divanda bir xola oʻtiribdimi? U nima qilyapti? U senga qoʻl silkiyaptimi?”. Agar chaqalogʻingiz imo-ishora yoki bola tilida javob bersa, xuddi odatiy suhbatdagidek gapirishni davom ettiring.
Yoki chaqalogʻingiz oʻyinchoqqa, masalan, yorqin rangli shaqildoqqa qarayotganini koʻrsangiz, oʻyinchoqni unga yaqin olib keling va ushlashi yoki shaqillatishi uchun bering.
