Ijtimoiy-hissiy rivojlanishni ragʻbatlantirish: oltinchi – oʻn ikkinchi oylar (6–12-oylar)

Farzandingiz ketib qolishingizga tobora koʻproq munosabat bildiryapti va yonida boʻlishingizni soʻrayapti. Bola endi sizni koʻrmagan taqdirda ham, borligingizni biladi, shuning uchun sizni qidiryapti. Bola begonalardan qoʻrqishi mumkin. Xotirjam boʻling, bu rivojlanishning muhim bosqichlaridan biridir. Farzandingiz siz bilan xavfdan xoli ekanini biladi.

Notanish odamlar bilan uchrashuvlar

Begona odamlar bilan uchrashganda bolangiz turli xil munosabat koʻrsatishi mumkin. U qiziqishi, quvonishi, shuningdek, qoʻrqishi yoki aloqadan qochishi mumkin. Bu reaksiyalarning barchasi tabiiydir. U bolaning temperamenti, oldingi tajribalari va vaziyatga bogʻliq. Asta-sekin tanishish, xotirjamlik va oʻzini xavfsiz his qilishi uchun bolaga yetarli vaqt berish bu tajribalarni qiziqarli qiladi.

Sizdan ajralishga munosabat

Bola ajralishlarga asta-sekin oʻrganib boradi va shuning uchun ular kundalik hayot tarzining bir qismi boʻlishi kerak. Xatti-harakatlaringiz aniq va izchil boʻlishi zarur. Xayrlashmay ketmang. Farzandingizga qachon ketishingiz va qachon qaytib kelishingiz haqida xabar bering. Asta-sekin bola bunday vaziyatlarni qabul qilishi osonlashadi. Bekinmachoq oʻynang. Bu ajralish qoʻrquvini yengishda bolaga yordam beradi.

Qoʻllab-quvvatlov izlab

Farzandingiz yangi vaziyatlarda sizga tobora koʻroq qaraydi, koʻrsatma izlaydi va reaksiyalaringizni (javoban harakatingizni) tushunadi. His-tuygʻularingiz, imo-ishoralaringiz va izohlaringiz asosida bola muhim xulosalar qiladi, xatti-harakatlarini toʻgʻrilaydi. Agar oʻzingizga ishonchsiz boʻsangiz yoki qoʻrqsangiz, bola ham qoʻrqadi. Bolangizga tushunarli reaksiyalar qiling. Nima boʻlayotgani haqida gaplashing, u siz bilan xavfsiz ekanini koʻrsating. Tez orada bola oʻzgarishlarni yanada koʻproq ishonch bilan qabul qiladi va mustaqil izlanishlarni boshlaydi.

Tuygʻular yanada murakkablashadi

Farzandingizdagi his-tuygʻularni qabul qiling va hurmatlang. Quvonch, gʻazab yoki xavotir tabiiy holatlardir. Ular hodisalarga munosabat sifatida yuzaga keladi. Sezgilarlarni nomlang, nima boʻlayotgani haqida gapiring. Soʻz, tushuntirish va reaksiyalaringiz bola his-tuygʻularini tushunishi va ularni yaxshiroq tartibga solishiga yordam beradi. Hech qachon bolani hissiyotlari uchun tanqid qilmang.