Ekran oldida vaqt oʻtkazish: chaqaloqlar va yosh bolalar

Oilaviy videosuhbatlarni hisobga olmaganda, ikki yoshdan kichik bolalar ekran oldida vaqt oʻtkazmagani yaxshiroq. Siz kichkintoyingiz uchun namuna boʻlib, gadjetlardan oqilona foydalanish odatini rivojlantirishga yordam berishingiz mumkin. Farzandingiz uyingizdagi ekranda nima tomosha qilishidan xabardor boʻling. Baʼzi dasturlar yoki filmlar va rasmlar bolani qoʻrqitishi mumkin.

Chaqaloqlar va yosh bolalar uchun ekran oldidagi vaqt

Amaldagi xalqaro qoidalarga koʻra, ikki yoshgacha boʻlgan bolalarga oilasi bilan videoqoʻngʻiroq orqali suhbatlashishdan tashqari, ekran qarshisida vaqt oʻtkazish tavsiya etilmaydi.

Juda yosh bolalar jismoniy faollik, ochiq havoda oʻynash, oʻqish, xayoliy oʻyinlar va oila va doʻstlar bilan muloqot qilish kabi haqiqiy hayotiy tajribalardan yaxshiroq oʻrganadi.

Videoqoʻngʻiroq zarar qilmaydi, chunki farzandingiz boshqa shaxs bilan oʻzaro muloqotda boʻladi. Bu bolangizning ijtimoiy va nutqiy rivojlanishini qoʻllab-quvvatlashi mumkin. Shuningdek, u oila va doʻstlar bilan aloqalar oʻrnatishga yordam beradi, ayniqsa, pandemiya tufayli muloqot qilish cheklangan paytlarda.

Agar farzandingiz ilovalar yoki televideniye dasturlari kabilarni tomosha qiladigan boʻlsa (ehtimol, kattaroq bolalar tomosha qilgani sababli), ekran oldida oʻtkaziladigan vaqtni qatʼiy cheklash va yoshga mos, sifatli kontentdan foydalanish zarur.

Ekran oldida vaqt oʻtkazishda shaxsiy namuna

Hatto bolangizni ekran oldiga yaqinlashtirmasangiz ham, u siz qanday vaqt oʻtkazishingizni koʻradi va sizning odatlaringizni oʻzlashtiradi.

Farzandingiz hali ancha yosh paytda ham ekran oldida oqilona vaqt oʻtkazishni oʻrgatish uchun unga oʻrnak boʻlishingiz mumkin. Masalan, siz:

  • kechki ovqat paytida telefoningizni oʻchirishingiz;
  • dasturni tomosha qilib boʻlgach, televizorni oʻchirib qoʻyishingiz;
  • ekran oldida vaqt oʻtkazish davomida ochiq havoga chiqib kelishingiz, mutolaa qilishingiz  va jismoniy mashgʻulot bilan shugʻullanishingiz;
  • bolangizga toʻliq eʼtibor berib, u bilan oʻynayotganingizda yoki ovqatlantirayotganingizda telefoningizni tekshirmaslikka harakat qilishingiz mumkin.

Gadjetlardan foydalanish imkoniyati

Oilangizda mobil telefonlar, televizorlar, kompyuterlar va planshetlar kabi bir qator qurilmalar boʻlishi mumkin. Demak, boshqalar ushbu gadjetlarni ishlatayotganda farzandingiz ekrandagi tasvirlarni koʻrishi mumkin.

Farzandingiz nimani koʻrishi mumkinligini bilish foydali. Misol uchun, yangiliklar yoki videooʻyinlardagi baʼzi tasvirlar hatto koʻrayotgan narsasini toʻliq tushuna olmaydigan juda yosh bolalar uchun ham anchagina qoʻrqinchli boʻlishi mumkin. Yosh bolalarni bunday tasvirlardan himoya qiling va ular katta yoshdagi bolalarga ham taʼsir oʻtkazishini esdan chiqarmang.