Гульні на прыродзе

Час на свежым паветры — гэта магчымасць для вашага дзіцяці і усёй сям’і атрымаць яркія ўражанні і перажыць разам прыгоды. Гульня на прыродзе азначае, што можна будзе запэцкацца — гуляючы з брудам, гуляючы прама на зямлі, збіраючы лісце, «гатуючы» суп з травы, малюючы кветачкамі, выціскаючы з іх каляровыя «чарнілы»... Хоць гульні на свежым паветры — гэта не пра чысціню і ахайнасць, гэта вельмі весела!

Звычайна гульні на прыродзе не маюць цвёрдых правіл. Навакольнае асяроддзе — лугі, лясы — патрабуе ад дзіцяці, каб яно прыдумвала, як яго даследаваць і як атрымліваць ад гэтага задавальненне. Такое стымуляванне вельмі карысна для дзяцей. Калі гэта магчыма, гульні на свежым паветры могуць прадугледжваць удзел дзіцяці ў паўсядзённых справах і яго дапамогу — догляд саду, двара, кветак і інш. Звычайная прагулка ў парку можа заахвоціць дзіця даведвацца новае пра бяспеку, разважаць пра навакольнае асяроддзе, назіраць за паводзінамі людзей і аналізаваць іх і г. д.

Першае, што прыходзіць на думку, калі мы ўзгадваем пра гульні на свежым паветры, — гэта значна меншая колькасць абмежаванняў у тым, што датычыцца руху. Нават для дзяцей, якія толькі вучацца хадзіць або адпрацоўваюць навык хадзьбы, і нават для тых, хто яшчэ поўзае, ёсць маса магчымасцей атрымаць асалоду ад такіх гульняў.

Для вельмі маленькіх дзяцей знаходжанне на вуліцы азначае разнастайнасць новых пахаў, гукаў, а таксама мноства магчымасцей даследаваць розныя паверхні навобмацак і гэтак далей. Хутчэй адпраўляйцеся са сваім дзіцем на пікнік — няхай яно з задавальненнем гуляе, лежачы на жывоціку на пледзе, поўзае па коўдры і па траве, глядзіць, як варушыцца лісце, шамаціць ножкамі па ім або хапае яго ручкамі. Не забывайце: радасць ад такіх прыгод напалову будзе залежаць ад зносін з вамі. Таму размаўляйце з дзіцем, бярыце яго на рукі, дапамагайце яму дацягвацца да таго, што яно хоча, вызначайце, што яму цікава ці што яно перажывае, і называйце гэта, стымулюйце дзіця гаварыць, абдымацца.