Birinchi kundan boshlab ijobiy eʼtibor
Boladagi xavfsizlik va himoyalanganlik hissi tarbiyachilar bilan gʻamxoʻr va yaqin munosabatlarga asoslangan. Agar chaqaloq qarab turganida unga tabassum qilsangiz, oʻziga ishonchi sust yoki qoʻrqqan paytida uni qoʻllab-quvvatlasangiz, qiziqishini payqasangiz, keyingi faoliyatlarga ruhlantirsangiz, bola oʻzini xavfsiz his qiladi va dunyoni siz bilan, keyinchalik boshqa muhim odamlar bilan birga oʻrganishga tayyor boʻladi.
Body
Shunday qilib, hayotning birinchi kunidan boshlab ijobiy eʼtiborni kuchaytiring:
- chaqalogʻingiz sizga qaraganda yoki tabassum qilganda jilmaying;
- chaqaloq yigʻlaganda unga tasalli bering;
- chaqaloq chiqaradigan tovushlarga javob bering: biror narsa ayting yoki uning ovoziga taqlid qiling;
- bola bilan koʻz uzmasdan gaplashing;
- ovozingizning ohangini yoki yuz ifodangizni oʻzgartirib, bolaning eʼtiborini tortib turing;
- mayin, sekin va tushunarli gapiring;
- chaqaloqni qiziqtirayotgan narsani kuzatib boring va bolani tadqiq qilishga – olish, intilish, sinab koʻrish, irgʻitish, harakatlantirish, koʻz bilan kuzatib borish, qidirishga undang; jilmaying, u nima qilayotganini ayting, uning muvaffaqiyatini chiroyli soʻzlar bilan eʼtirof eting;
- chaqaloqning reaksiyasini kuting: u qanchalik sodda boʻlmasin, bolaga javob qaytarish uchun vaqt bering. Siz unga murojaat qilganingizda chaqaloq nima soʻrayotganingizni tushunishi va siz tomonga qarashi uchun vaqt kerak;
- kuting va farzandingiz muvaffaqiyat qozonganida uni tabassum va koʻplab yoqimli soʻzlar bilan siylang. Siz u bilan gaplashganingizda chaqaloq ovoz chiqarib, sizga biror narsa “aytishni” xohlashi mumkin;
- chaqaloqqa ishtirok etish uchun vaqt bering. Uni kuzatib turing va u yuz ifodasini, ogʻzining holatini oʻzgartirganda yoki ovoz chiqarganda bunday xatti-harakatlarni tabassum va muloyim soʻzlar bilan kutib oling.
