Si të flini më mirë: për prindërit!

Gjumi në ditët e para të prindërimit

Nëse kurrë më parë nuk keni pasur një periudhë të keqe të gjumit, ju mund të pësoni një tronditje nga ndikimi që ka mungesa e gjumit në jetën tuaj. Prindërit e rinj shpesh thonë se nuk e besonin se do të ishte aq e vështirë.

Mund të duhet pak kohë, që foshnjat të vendosen në një rutinë të rregullt, dhe kjo e bën të vështirë kohën e gjumit dhe pushimin që ju nevojitet. Në javët e para, pak më shumë gjumë mund të jetë gjë e vështirë.

Sa është koha e nevojshme për gjumë 

Në përgjithësi, të rriturit kanë nevojë për rreth 7- 8 orë gjumë në natë për t’u ndjerë mirë dhe të pushuar, megjithëse kjo ndryshon nga 5 -10 orë, në varësi të personit.

Ju mund të keni nevojë të flini më tepër nëse:

• e keni të vështirë të zgjoheni në mëngjes, ose ndiheni të përgjumur gjatë gjithë kohës
• nuk mund të përqëndroheni
• jeni pa humor, nervozë, ose vuani nga ankthi apo gjendje depresive.
• papritur ju zë gjumi gjatë ditës.

Ashtu si foshnja juaj ka nevojë për gjumë për të qenë të qetë, edhe juve ju duhet gjumë mjaftueshëm për të vazhduar  dhe për të shijuar prindërimin. Pushimi i mjaftueshëm ju ndihmon ta bëni këtë, dhe ju bën të ndiheni më të lumtur dhe më të qetë. Gjithashtu, foshnja juaj i përgjigjet ndjenjave tuaja, kjo do të thotë se ai/ajo do të ndihet më i/e kënaqur.

Si të flini më mirë dhe të ndjeheni më të qetësuar

Gjumi i mjaftueshëm gjatë muajve të parë me foshnjen tuaj mund të jetë i vështirë. Koha e fjetjes varet nga ajo që po ndodh me të. Por ka disa gjëra që ju mund t’i bëni që të ndiheni më mirë dhe të pushoni.

Para se të shkoni në shtrat
Këto këshilla mund t’ju ndihmojnë të bëni një gjumë më të mirë gjatë natës:

• Vendosni një rutinë të rregullt të gjumit.
• Gjeni mënyra për t'u qetësuar para se të shkoni në shtrat - për shembull, lexoni një libër, dëgjoni muzikë të lehtë, ose përdorni teknika relaksimi si frymëmarrja e thellë.
• Shmangni çajin, kafen, pijet joalkoolike, pijet energjike, çokollatat dhe stimulantë të tjerë afër kohës së gjumit. Këto e bëjnë pushimin dhe fjetjen më të vështirë dhe ndikojnë në gjumin tuaj.
• Shmangni përdorimin e pajisjeve digjitale në dhomën tuaj të gjumit, duke përfshirë televizorin, telefonat celularë dhe tabletin.

Në shtrat
Mund të jetë e vështirë të qetësoheni pas një dite të gjatë, ose të ndaloni së menduari për të fjetur gjumë. Nëse keni vështirësi për të fjetur, përpiquni të mos shqetësoheni dhe të dëshpëroheni. Në vend të kësaj, provoni t`i kujtoni vetes se gjithçka është në rregull në mënyrë që ju të jeni të rehatshëm dhe të qetë në shtrat.

Nëse kjo nuk funksionon, mund të jetë më mirë të ngriheni dhe ta shkruani atë që keni në mendjen tuaj. Pastaj mund të provoni të kaloni përsëri në rutinën tuaj të gjumit.

Gjatë ditës

T`i kushtoni kohë vetes tuaj mund t’ju ndihmojë të ndiheni më mirë. Qoftë dhe vetëm pesë minuta duke lexuar një libër, duke bërë ecje përreth shtëpisë (në lagje), ose duke medituar mund t’ju japë ndjenjën e të qenit të pushuar kur nuk flini sa duhet.

Ekziston mundësia për ta “kompensuar” gjumin e humbur, kështu që flini pak gjatë ditës, kur të jetë e mundur. Ju gjithashtu mund ta kompensoni gjumin e humbur gjatë javës, duke fjetur më shumë gjatë fundjavës.

Aktiviteti fizik dhe ushqimi i shëndetshëm mund t'ju japin më shumë energji, prandaj gjeni kohë për ushtrime fizike dhe ushqim të mirë - çdo përpjekje e vogël është në favorin tuaj.

Rutinat e përditshme 
Nëse keni mundësi, ndajeni kujdesin për foshnjen me partnerin tuaj (kështu që të dy të ndjeheni sa më të qetësuar), me një anëtar të familjes ose një mik.

Kujdesi me radhë ose me turne përgjatë natës mund të bëjë një ndryshim. Kjo mund të jetë më e vështirë për nënat që ushqejnë me gji. Në këtë rast, çelësi është që të përpiqeni të pushoni ndërsa foshnja juaj është duke pushuar. Në fundjavë, ju mund të flini më gjatë, ose të dremisni gjatë ditës.

Përdorimi i energjisë tuaj për gjërat që janë më të rëndësishme për ju mund t’ju ndihmojë të ndiheni më mirë në fund të ditës - edhe nëse jeni të lodhur. Për shembull, ju mund të zgjidhni të luani me fëmijët tuaj ose të kaloni kohë me familjen ose miqtë në vend që të fshini shtëpinë.

Janë disa punë të përditshme që ju thjesht duhet t’i bëni, mirëpo edhe punët më të lehta mund t’ju duken të rënda, kur jeni të lodhur. Nëse i ndani punët  dhe përqendroheni një nga një në secilën, ato mund të duken më të menaxhueshme - dhe ju mund t’i jepni vetes një shpërblim pasi të përfundoni secilën prej tyre. Mirëpo ndonjëherë punët mund të duhet të presin, pa marrë parasysh se sa të rëndësishme janë ato.

Pritshmëritë e ulëta mund ta zbusin presionin. Ndonjëherë ajo që presim nga vetja mund të jetë joreale. Për shembull, mund të presim që të luajmë me fëmijët, të shkojmë në punë, të ndihmojmë në kujdesin e fëmijëve, t`i dërgojmë në shkollë, të gatuajmë një darkë të mahnitshme, të lajmë tre lavatriçe me rroba dhe të shkojmë në palestër.

Ka raste kur mund t’i bëni të gjitha këto. Por mund të ketë disa ditë apo edhe javë, kur ndiheni se nuk e keni energjinë e duhur, dhe mund t’ju duhet të rishikoni se sa mund të bëni – gjë që është në rregull. Kur ju bisedoni me prindërit e tjerë, do ta shihni se edhe ata përballen me të tilla gjëra.

Nëse jeni duke luftuar me veten për t’i menaxhuar rutinat e përditshme për shkak të gjumit të pamjaftueshëm, është në rregull t’i kërkoni ndihmë familjes ose miqve. Madje nëse mendoni se mungesa e gjumit po ndikon te ju në aspektin mendor ose emocional, është një ide shumë e mirë të bisedoni me mjekun tuaj ose me një profesionist tjetër shëndetësor.