Хоби кӯдакони синни томактабӣ: чиро интизор бояд шуд
Хоби кӯдакони синни томактабӣ: чиро бояд донед
Ба кӯдакони синни 3-5 сола дар як шабонарӯз тақрибан 10-13 соат хоб кардан лозим аст. Баъзеҳо инчунин метавонанд рӯзона тақрибан як соат хоб кунанд.
Хоб барои саломатӣ, афзоиш ва рушди кӯдаки синни томактабии шумо муҳим аст. Вақте ки кӯдакон хуб хоб мекунанд, онҳо тамоми рӯз оромтар ва хушҳол мешаванд. Миқдори дурусти хоб системаи масунияти кӯдакро низ мустаҳкам мекунад ва хатари сироят ва бемориҳоро коҳиш медиҳад.
Тарсҳо ва даҳшатҳои шабона
Дар байни кӯдакони синни томактабӣ тарс ва даҳшатҳои шабона хеле маъмуланд. Тарсҳо ва даҳшатҳои шабона дар вақтҳои гуногуни шаб рух медиҳанд ва шумо бояд дар ин ҳолат бо роҳҳои гуногун амал кунед.
Тарсҳои шабона
Тарсҳои шабона дар соатҳои аввали шаб, ҳангоми хоби чуқур рух медиҳанд. Агар фарзанди шумо тарси шабона дошта бошад, вай воқеан хоб аст, гарчанде ба назар бедор метобад. Масалан, чашмонаш кушода буда метавонанд ё ӯ ҳаракат мекунад. Аммо ӯ мисли одатӣ ба шумо вокуниш намекунад.
Тарсҳои шабона метавонанд хатарнок ба назар расанд, аммо онҳо ба фарзанди шумо зарар намерасонанд.
Дар вақти тарси шабона кӯдакро бедор накунед, зеро ин боиси боз ҳам дарозтар шудани онҳо мегардад. Ба ҷои ин, мунтазир шавед, ки фарзанди шумо гиря кардан ва беқаророна ҷунбиданро бас кунад. Агар ӯ аз ҷой бархезад, ӯро дубора ба ҷогаҳ гузоред. Пас аз тарси шабона кӯдакон одатан зуд хоб мераванд ва субҳ онҳоро дар ёд надоранд.
Хобҳои даҳшатовар
Хобҳои даҳшатовар одатан дар нимаи дуюми шаб рух медиҳанд, вақте ки кӯдакон бештар хоб мебинанд. Онҳо бо рушди тасаввурот дар кӯдакони синни томактабӣ алоқаманданд. Агар фарзанди шумо хоби даҳшатнок бинад, ӯ метавонад аз хоб ғамгин бедор шавад. Вай метавонад хоби даҳшатнокро ба ёд орад ва дар бораи он ба шумо нақл кунад.
Агар фарзанди шумо хоби даҳшатовар дида бошад, ӯро бояд ба оғӯш гиред, тасаллӣ диҳед ва ором кунед – масалан, «Ҳақиқатан, хобҳои бад бисёр даҳшатноканд. Ман бо ту ҳастам, ман ҳамеша ин ҷо ҳастам». Барои аз нав хоб рафтани кӯдак шояд чанд вақт лозим шавад.
Омодагӣ ба хоб
Баъзан кӯдакони синни томактабӣ метавонанд сусттар хоб кунанд, зеро онҳо ҳатто баъд аз ба ҷогаҳ хобидан дар бораи рӯйдодҳои рӯз фикр мекунанд. Реҷаи муқарраршудаи омодагӣ ба хоб метавонад дар ин кор кӯмак кунад, хусусан агар шумо онро ҳам дар рӯзҳои корӣ ва ҳам дар рӯзҳои истироҳат мунтазам риоя кунед.
Аксарияти кӯдакони синни томактабӣ тақрибан соати 19:00 ба хоб рафтан омодаанд, хусусан агар онҳо дар кӯдакистон рӯзи пурмазмун дошта бошанд. Аммо баъзеҳо метавонанд афсонаҳои бештар ва бештарро пеш аз хоб талаб кунанд, зеро онҳо кӯшиш мекунанд, ки хоб рафтанро ба таъхир андозанд. Шумо метавонед пеш аз хоб қоидаи ду ё се китоб муқаррар кунед ва ба фарзандатон ваъда диҳед, ки дар давоми рӯз бештар мехонед. Ба фарзандатон шабона бо пистонак хоб рафтанро одат накунонед.
Агар кӯдак пас аз хобонидан аз ҷой бархезад
Шояд кӯдаки синни томактабии шумо марҳилаеро тай кунад, ки ӯ шуморо ба назди худ ҷеғ занад ё пас аз он ки шумо ба ӯ шаби хуб гуфтед, аз ҷояш бармехезад. Маслиҳатҳои зеринро истифода баред:
- Пеш аз хоб аз бозиҳои пурғавғо, инчунин тамошои телевизор ва истифодаи компютер, телефон ё планшет худдорӣ намоед. Ин фаъолиятҳо метавонанд ором шудани кӯдакро душвортар созанд.
- Тартиби муайяни омодагиро ба хоб муқаррар кунед, ки ба фарзандатон имкон медиҳад ба хоб омода шавад.
- Боварӣ ҳосил кунед, ки ҳуҷраи кӯдак ором буда, шабчароғ фурӯзон аст, ва на аз ҳад гарм ва на аз ҳад сард мебошад.
- Пеш аз он ки аз ҳуҷра берун шавед, боварӣ ҳосил кунед, ки фарзанди шумо ҳама чизеро, ки барои хоб кардан лозим аст – бозичаи мулоими дӯстдоштааш ё кӯрпа дорад. Ба ӯ хотиррасон кунед, ки оромона дар ҷогаҳ хобад.
- Агар шумо хоҳед реҷаеро муқаррар кунед, ки ҳар дафъае, ки ӯ шуморо ҷеғ мезанад, ба назди фарзандатон намеравед, мунтазам бошед ва танҳо вақте ҷавоб диҳед, ки ӯ воқеан ба чизе ниёз дорад.
- Агар фарзанди шумо аз ҷогаҳ бархезад, оромона аз ӯ хоҳиш кунед, ки ба ҷогаҳ баргардад. Гӯед ки шумо дар ҳуҷраи дигар ҳастед. То он даме, ки фарзанди шумо аз ҷояш хестанро қатъ накунад, ин амалро мунтазам ва оромона такрор кунед.
Баъзан фарзанди шумо воқеан ба чизе ниёз дорад. Агар вай аз дев дар зери кат тарсад, зуд ба атроф нигаред ва ба ӯ гӯед, ки дев вуҷуд надорад. Пас аз ин, кӯдаки шумо метавонад ором шавад. Агар фарзанди шумо аз торикӣ тарсад, шабчароғ истифода баред.
Агар фарзанди шумо мушкилоти хоб дошта бошад, беҳтар аст, ки онро бо истифода аз стратегияҳои мушаххаси рафтор ҳал кунед, масалан, тартиб додани реҷаи муайяни омодагӣ ба хоб. Доруҳои хоб одатан роҳи ҳалли мушкилоти хоби кӯдакон нестанд.
