Карысныя напіткі для дзяцей
Карысныя напіткі для немаўлят ва ўзросце да 6 месяцаў
Дзецям, малодшым за 6 месяцаў, патрабуецца толькі грудное малако або сумесь, якія служаць ім і ежай, і пітвом.
Карысныя напіткі для дзяцей у 6–12 месяцаў
З 6 месяцаў вы можаце даваць дзецям на грудным і штучным выкормліванні невялікую колькасць астуджанай кіпячонай водаправоднай вады з кубка.
Піццё з кубка, а не з бутэлечкі дапамагае дзіцяці навучыцца абыходзіцца з ім.
Калі ў першыя 12 месяцаў даваць дзіцяці іншыя напіткі, акрамя вады, груднога малака ці сумесі, яно можа атрымліваць недастаткова неабходных пажыўных рэчываў.
Карысныя напіткі для дзяцей, старэйшых за 12 месяцаў
Калі дзіцяці споўніцца 12 месяцаў, то пры ўмове збалансаванасці яго рацыёну яму можна даваць пастэрызаванае неараматызаванае тлустае каровіна малако.
Нятлустае малако не рэкамендуецца дзецям, малодшым за два гады. Гэта звязана з тым, што ім неабходны пажыўныя рэчывы з тлустага малака для задавальнення іх патрэб у энергіі, забеспячэння іх росту і развіцця.
Вы можаце працягваць карміць грудзьмі і пасля 12 месяцаў да таго часу, пакуль гэта зручна вам і вашаму дзіцяці. Калі дзіця харчавалася сумессю, па дасягненні ўзросту 12 месяцаў яна яму больш не патрэбна.
Дзецям, старэйшым за 12 месяцаў, таксама можна піць ваду з-пад крана (яе неабавязкова кіпяціць) або ўпакаваную (бутыляваную) ваду для дзяцей.
Карысныя напіткі для малых дзяцей, дашкольнікаў і дзяцей старэйшага ўзросту
Для малых дзяцей і дзяцей старэйшага ўзросту лепшымі напіткамі з’яўляюцца пітная вада з-пад крана і малако.
Калі дзіця рэгулярна п’е шмат вады на працягу дня, у яго арганізме падтрымліваецца нармальны ўзровень вадкасці. Гэта асабліва важна ў спякотнае надвор’е ці калі дзеці актыўна рухаюцца. Акрамя таго, багатае пітво можа дапамагчы пазбегнуць запораў.
Заахвочвайце дзіця да таго, каб яно піло больш вады
Вось некалькі парад, дзякуючы якім дзіця будзе піць ваду з задавальненнем:
- Прывучайце ўсіх членаў сям’і піць пераважна ваду. Дзеці, бачачы гэта, хутчэй за ўсё, будуць рабіць тое самае.
- Няхай вада будзе заўсёды даступная: дома дзецям малодшага ўзросту прапануйце бутэлькі з вадой, а старэйшым пакажыце, як набіраць ваду з-пад крана.
- Стаўце ваду на стол падчас ежы і перакусаў.
- Захоўвайце астуджаную ваду ў збане ў халадзільніку. Каб дзіцяці было больш цікава яе піць, можна дадаваць кубікі лёду або кавалачкі замарожанай садавіны.
- Бярыце з сабой бутэлькі з вадой на прагулку.
Нездаровыя напіткі
Фруктовыя сокі
Фруктовыя сокі ўтрымліваюць шмат цукру і кіслаты, пры гэтым у іх амаль няма клятчаткі. Дзецям не патрэбен дадатковы цукар, але патрэбна клятчатка. Таму ім лепш есці садавіну, чым піць сок.
Калі дзіця ўсё ж п’е сок, яго колькасць варта абмежаваць да паловы шклянкі ў дзень. Рэкамендуецца змешваць фруктовы сок з невялікай колькасцю вады ці лёду і нават дадаваць туды крыху працёртай гародніны. Выкарыстанне блэндара замест сокавыціскалкі дазволіць захаваць у соку мякаць.
Дзецям лепш за ўсё есці суцэльную садавіну і піць ваду з-пад крана ці кіпячоную або малако. Заўсёды лепш аддаць перавагу вадзе, а не фруктоваму соку, паколькі яна спаталяе смагу і не ўтрымлівае цукру.
Салодкія прахаладжальныя, а таксама спартыўныя і энергетычныя напіткі, мінеральная вада, араматызаванае малако
Салодкія прахаладжальныя напіткі, а таксама спартыўныя і энергетычныя напіткі ўтрымліваюць шмат цукру, пры гэтым у іх практычна адсутнічаюць пажыўныя рэчывы.
Яны не падыходзяць дзецям, бо замяняюць іншыя больш пажыўныя прадукты і напіткі і іх ужыванне можа прывесці да павелічэння вагі або разбурэння зубоў. Акрамя таго, многія прахаладжальныя напіткі ўтрымліваюць кафеін, які можа выклікаць у дзіцяці моцнае ўзбуджэнне, а затым заняпад сіл, а таксама ўплываць на сон дзіцяці.
Мінеральная вада можа змяшчаць вялікую колькасць некаторых мінералаў, якія аказваюць нагрузку на ныркі дзіцяці. Араматызаваныя яе разнавіднасці таксама могуць утрымліваць вялікую колькасць цукру.
Араматызаванае малако і малочныя напіткі для сняданку ўтрымліваюць шмат цукру, таму лепш прапаноўваць дзецям простае малако.
Чай і кава
Чай і кава ўтрымліваюць кафеін, які можа ўплываць на сон, паводзіны і развіццё дзіцяці.
Некаторыя травяныя чаі ўтрымліваюць шкодныя для дзяцей злучэнні. Калі ў вас ёсць пытанні наконт травяных чаёў для дзіцяці, пракансультуйцеся з урачом.
