Як прыгатаваць здаровую ежу для дзіцяці

Калі справа датычыцца планавання рацыёну і прыгатавання здаровай ежы для свайго дзіцяці, трэба ўлічваць некаторыя шкодныя звычкі, якія ёсць ва ўсіх нас. Клопат аб дзіцячым харчаванні — гэта таксама магчымасць перагледзець свае звычкі і ўнесці некаторыя станоўчыя змены ў сямейны рацыён.

Выкарыстоўвайце як мага менш солі ці па магчымасці не дадавайце яе зусім. Старайцеся не саліць ужо прыгатаваную страву. У гатовых і кансерваваных прадуктах утрыманне солі павышана. Нязначная колькасць солі ў рацыёне дапушчальна, бо ў ёй утрымліваецца ёд, неабходны для звычайнага функцыянавання шчытападобнай залозы.

Акрамя таго, варта максімальна абмежаваць ужыванне дзіцем цукру / салодкіх прысмакаў, паколькі яны павялічваюць рызыку атлусцення і дыябету, а таксама правакуюць развіццё карыесу.

Пазбягайце пустых калорый — прадуктаў, у складзе якіх занадта многа вугляводаў, тлушчаў, цукру і солі і адсутнічаюць каштоўныя інгрэдыенты (закускі, ежа хуткага прыгатавання, чыпсы, цукеркі, вафлі). Гэтыя прадукты шкодныя і да таго ж дарагія.

Гатовая ежа таксама ўтрымлівае штучныя падсалоджвальнікі, узмацняльнікі смаку, кансерванты і іншыя дабаўкі, шкодныя для арганізма, асабліва дзіцячага.

Прамыслова перапрацаванае мяса, асабліва таннейшае, такое як салямі, паштэты, сасіскі, часта вырабляецца з няякасных складнікаў невядомага паходжання, можа ўтрымліваць гармоны, антыбіётыкі і іншыя дабаўкі і кансерванты. Яны не пашкодзяць, калі з’есці іх адзін-два разы, але частае ўжыванне на працягу некалькіх гадоў будзе адбівацца на агульным развіцці і фарміраванні дзіцяці.

Уважліва чытайце інфармацыю на этыкетках прадуктаў, якія набываеце: тэрмін прыдатнасці, склад, паходжанне, якія дабаўкі выкарыстоўваюцца.