Баланс паміж працай і асабістым жыццём: парады для вашай сям'і

Што такое баланс паміж працай і асабістым жыццём

Баланс паміж працай і асабістым жыццём — гэта ўзаемасувязь паміж працай і іншымі важнымі для вас рэчамі — сям’ёй, хатнімі справамі, грамадскім жыццём, спортам, хобі і інш. Калі вы адчуваеце, што ў вас дастаткова часу для ўсяго гэтага, значыць, у вас добры баланс паміж працай і асабістым жыццём.

Універсальнай формулы балансу паміж працай і асабістым жыццём не існуе. Ва ўсіх ён розны, таму што кожная сямейная сітуацыя індывідуальная і ўнікальная. Баланс можа мяняцца пры якіх-небудзь зменах у вашай працы, сям’і і ў іншых сферах.

Маючы рэалістычныя чаканні, метадам спроб і памылак вы, верагодна, знойдзеце падыход, які дапаможа вам і вашай сям’і дасягнуць балансу паміж працай і асабістым жыццём у доўгатэрміновай перспектыве.

Перавагі ўстанаўлення балансу паміж працай і асабістым жыццём

Асабістыя перавагі

Пошук балансу паміж працай і асабістым жыццём дазволіць вам:

• зменшыць узровень стрэсу і стомленасці;
• устанавіць кантроль за сваім часам;
• хутка прымаць рашэнні і выконваць узятыя на сябе абавязацельствы;
• падтрымліваць здароўе.

Добра збалансаванае і гарманічнае сямейнае жыццё можа дапамагчы прадухіліць выгаранне на працы.

Перавагі для дзяцей

Каб развівацца і вучыцца, дзецям патрэбны ваша ўвага і сумеснае баўленне часу. Лепшы час для вашага дзіцяці — гэта калі вы фізічна і эмацыянальна знаходзіцеся побач з ім. Баланс паміж працай і асабістым жыццём можа дапамагчы вам знайсці неабходны час для свайго дзіцяці.

Перавагі для вашых адносін

Час, праведзены разам і з задавальненнем, з’яўляецца асновай пабудовы любых адносін. Добры баланс паміж працай і асабістым жыццём дае вам час і энергію для наладжвання лепшых адносін з вашым дзіцем і вашым партнёрам.

Як можа парушыцца баланс паміж працай і сямейным жыццём

Праца можа перашкаджаць праводзіць дастаткова часу з вашай сям’ёй.

Відавочна, што час, які вы праводзіце за працай, — гэта час, які вы не можаце прысвяціць сваім дзецям. Калі ў вас працяглы працоўны дзень, значыць, вы прыходзіце дадому, калі вашы дзеці ляглі спаць, ці сыходзіце да таго, як яны прачынаюцца. Вы наўрад ці ўбачыце іх на працягу тыдня. І калі вы прыносіце працу дадому, гэта таксама можа паўплываць на тое, колькі часу вы праводзіце з дзецьмі.

Пастаянная занятасць на працы можа адмоўна адбіцца на часе, які вы праводзіце разам са сваімі дзецьмі. Напрыклад, вы можаце быць дома, але ўсе вашыя думкі будуць заняты працоўнымі пытаннямі. Вы можаце ўспамінаць пра тое, што адбывалася на працягу дня, ці ўсё яшчэ засяроджвацца на рашэнні працоўнай праблемы.

Чаму дзецям трэба, каб вы кожны дзень адключаліся ад працы

Дзеці часта маюць патрэбу ў вашай увазе. І часцей за ўсё ў канцы дня — якраз тады, калі вам можа быць цяжка ўдзяліць ім час. Магчыма, яны захочуць расказаць вам усе навіны дня або папрасіць вас дапамагчы з чым-небудзь.

 У дзяцей таксама могуць быць дрэнныя дні, напрыклад, у дзіцячым садку ці ў школе. Ім могуць спатрэбіцца ваша спачуванне ці парада, або яны могуць проста захацець, каб вы іх выслухалі і пашкадавалі. У канцы дня, калі ўсе дома, дзеці малодшага ўзросту часта бываюць стомленымі, капрызнымі ці галоднымі. Магчыма, ім проста патрэбны будуць вашы абдымкі і ласкавыя словы.

Гэта можа быць складанай задачай, асабліва калі вы гатуеце вячэру і рыхтуецеся да наступнага дня. Але, магчыма, варта выдзеліць час, каб спыніцца, паслухаць дзіця і пагутарыць з ім. Гэта пераконвае дзяцей у тым, што іх любяць, што яны ў бяспецы, і гэта можа дапамагчы вам усім расслабіцца і адчуць сябе лепш.

Вы можаце быць занятыя прыгатаваннем вячэры ці падрыхтоўкай да наступнага дня, але вам заўсёды варта ўдзяляць увагу свайму дзіцяці, выслухоўваць яго і размаўляць з ім. Многія бацькі лічаць гэта адным з абавязкаў, але калі паглядзець глыбей, то вы ўсвядоміце, як выдатна мець дзіця, з якім пасля вяртання дадому можна падзяліцца цэлым светам.

Новыя ўмовы працы для лепшага балансу паміж працай і асабістым жыццём

Калі вы працуеце, вам варта падумаць пра тое, як арганізаваць працу так, каб не нашкодзіць сям’і. Паспрабуйце высветліць, на якія льготы вы маеце права, перагледзьце ваш працоўны кантракт і пагаварыце са сваімі калегамі. Затым абмяркуйце гэтае пытанне з кіраўніком.

Магчымыя варыянты:

• гібкі графік працы — напрыклад, вы можаце часам спазняцца ці не будзеце працаваць позна, альбо наадварот. Гібкі графік можа дапамагчы вам арганізаваць некаторыя рэжымныя моманты, напрыклад, калі вы адводзіце ці забіраеце дзіця з ясляў;
• дыстанцыйная праца з дому;
• праца па графіку няпоўнага працоўнага тыдня ці скарочанага працоўнага дня.

Не важна, што робяць вашыя сябры, калегі ці што думаюць іншыя людзі пра тое, як вам варта паступаць, — выберыце варыянт, які лепш за ўсё падыходзіць для вашай сям’і.

Змена працоўных звычак

Калі ў вас ёсць дзеці, магчыма, вам будзе карысна перагледзець свае працоўныя звычкі. Вось некалькі ідэй:

• Перад тым, як сысці з працы, успомніце свой рабочы дзень. Гэта дапаможа вам паступова перайсці да разважанняў пра дом і сям’ю.
• Калі ваша сям’я дазваляе вам затрымацца на працы, то лепш скончыць заданне, а не браць яго дадому. Аднак больш працяглы працоўны дзень можа быць не найлепшым варыянтам у доўгатэрміновай перспектыве.
• Пастарайцеся арганізаваць сваю дзейнасць так, каб самыя складаныя працоўныя задачы вырашаліся ў першай палове дня, а не ў другой.
• Знайдзіце хвілінку ў сваім працоўным дні, каб адчуць сувязь з вашым дзіцем. Гэта можа быць проста — напрыклад, паглядзіце на фотаздымак або падумайце пра нешта асаблівае, чым вы нядаўна разам займаліся. Гэта дапаможа вам успомніць прычыну, па якой вы спрабуеце дасягнуць балансу паміж працай і асабістым жыццём.
• Паспрабуйце ўстанавіць некаторыя ліміты на тое, колькі працы вы будзеце выконваць дома, у тым ліку абмежаванне часу на праверку пошты і адказы на электронныя лісты або тэлефонныя званкі.

Загадзя пераключайцеся з працы на дом і сям’ю

Вы можаце адчуць сябе больш гатовымі да зносін са сваімі дзецьмі, вярнуўшыся дадому, калі здолееце ў думках «адпачыць ад працы» ў дарозе. Паспрабуйце некаторыя з гэтых спосабаў:

• Выключыце працоўны тэлефон і пераключыцеся, паслухайце музыку, радыё ці аўдыякнігу альбо зрабіце фізічныя практыкаванні — паспрабуйце прагуляцца або паехаць дадому на веласіпедзе, калі ёсць магчымасць.
• Падумайце, як зрабіць час у дарозе больш расслабляльным. Напрыклад, пракладзіце маршрут праз парк або скарыстайцеся грамадскім транспартам, калі гэта дазваляе ваша сітуацыя.
• Падумайце пра сваё дзіця і пра тое, чым вы разам зоймецеся, калі прыйдзеце з працы дадому.

Ніжэй прыведзены ідэі, як правесці вечар з задавальненнем і карысцю:

• Прыдумайце рытуал або прытрымлівайцеся пэўных правілаў, каб зафіксаваць фізічны, разумовы і эмацыянальны пераход ад працы да дома, ад прафесіянала да маці/бацькі. Гэта можа быць нешта простае, напрыклад, змена працоўнага адзення на хатняе.
• Пагаварыце са сваёй сям’ёй, уключаючы дзяцей старэйшага ўзросту, пра складанасці пераходу з адной ролі ў іншую пры стрэсавых сітуацыях на працы. Дапамажыце ім зірнуць на рэчы з вашага пункту гледжання, паспрабуйце ўспрыняць сітуацыю з пазіцыі дзяцей. Супастаўце рэальныя магчымасці і чаканні адносна асабістага і сямейнага часу.
• Калі вы працуеце з дому, паспрабуйце аддзяліць працоўнае месца ад сямейнай прасторы. Устанавіце графік пачатку і заканчэння працы і дакладна паведамляйце калегам і кліентам пра час, калі вы недаступныя.
• Папрасіце вашага партнёра ці таго, хто дапамагае даглядаць ваша дзіця (няню, выхавацеля, бабулю), расказаць вам пра дзень вашага дзіцяці, пра прыемныя і не вельмі падзеі, якія маглі паўплываць на яго настрой. Гэта дапаможа вам падрыхтавацца да таго, каб прысвяціць яму неабходны час і ўвагу з максімальнай карысцю.

Існуюць пэўныя жыццёвыя абставіны, якія могуць ускладніць знаходжанне балансу паміж працай і домам, — няпоўная сям’я або выхаванне дзіцяці з асаблівасцямі развіцця. У такіх сітуацыях вы можаце звярнуцца да родных, сяброў ці спецыялістаў для атрымання неабходнай дапамогі і падтрымкі.